ប្រធានក្រុមការងារសហភាពសហព័ន្ធយុវជនកម្ពុជាវិស័យសាធារណការនិងដឹកជញ្ជូន ដឹកនាំកិច្ចប្រជុំពិនិត្យ និងពិភាក្សាលើលទ្ធផលការងារដើម្បីត្រៀមរៀបចំសន្និបាតបូកសរុបលទ្ធផលការងារប្រចាំឆ្នាំ --- ថ្ងៃសុក្រ ៩រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២០ ខែធ្នូ ឆ្នាំ២០១៩ ប្រធានក្រុមការងារ សហភាពសហព័ន្ធយុវជនកម្ពុជា (ស.ស.យ.ក) នៃវិស័យសាធារណការនិងដឹកជញ្ជូន បានអញ្ជើញដឹកនាំកិច្ចប្រជុំពិនិត្យ និងពិភាក្សាលើលទ្ធផលការងាររបស់ក្រុមការងារសម្រាប់ត្រៀមរៀបចំសន្និបាតបូកសរុបលទ្ធផលការងារ ស.ស.យ.ក វិស័យសាធារណការ និង ដឹកជញ្ជូន និងលើកទិសដៅការងារសម្រាប់ឆ្នាំ២០២០។ កិច្ចប្រជុំនេះមានការចូលរួមពីប្រធានផ្នែកទាំង៦ រួមមានប្រធានផ្នែករដ្ឋបាល ប្រធានផ្នែកដឹកជញ្ជូន ប្រធានផ្នែកត្រួតពិនិត្យតាមដាន និងវាយតម្លៃ ប្រធានផ្នែកសាធារណៈការ ប្រធានផ្នែកកំពង់ផែភ្នំពេញ ប្រធានផ្នែកកំពង់ផែស្វយ័តក្រុងព្រះសីហនុ ក្រុមការងារបាល់ទាត់ និងក្រុមការងារអាជីវកម្ម។ សូមជម្រាបជូនថា ក្រុមការងារ ស.ស.យ.ក វិស័យសាធារណការនិងដឹកជញ្ជូនបានទទួលការយកចិត្តទុកដាក់និងលើកទឹកចិត្តពីសំណាក់ថ្នាក់ដឹកនាំក្រសួង និងស.ស.យ.ក ថ្នាក់កណ្ដាលដើម្បីឲ្យយុវជនដែលជាសមាជិកសមាជិកាអាចចូលរួមការងារមនុស្សធម៌ ការងារសង្គម ការងារចលនាមហាជន និងការបរិច្ចាគធនធាន ព្រមជាមួយនឹងការពង្រឹងសាមគ្គីភាព និងប្រមូលកម្លាំងយុវជនរួមគ្នាដើម្បីបុព្វហេតុជាតិនៅពេលបច្ចុប្បន្ន និងអនាគត៕