[Kley Kley News] - អាជ្ញាធរខេត្តព្រះសីហនុ គ្រោងធ្វើស្ពានដែកមួយ ឆ្លងកាត់ពីលើផ្លូវជាតិលេខ៤
2019-02-04
ទៅកាន់ទំព័រចុះផ្សាយក្នុង Kley Kley News
រដ្ឋបាលខេត្តព្រះសីហនុ គ្រោងនឹងធ្វើស្ពានដែកមួយឆ្លងកាត់ពីលើផ្លូវជាតិលេខ៤ នៅចំណុចមុខរោងចក្រញូស្តារ ដើម្បីជួយសម្រួលដល់ការធ្វើដំណើរឆ្លងផ្លូវជាតិទៅមក របស់កម្មករ-កម្មការិនីនៃរោងចក្រដែលមានប្រមាណជាង ៤ពាន់នាក់។ នេះបើតាមការបង្ហោះនៅលើទំព័រហ្វេសប៊ុករបស់រដ្ឋបាលខេត្តព្រះសីហនុ នាថ្ងៃទី៣ ខែកុម្ភៈ ឆ្នាំ២០១៩។
លោក យន្ត មីន អភិបាលខេត្តព្រះសីហនុ បានថ្លែងថា ស្ពាននេះត្រូវបានជំនាញសិក្សារួចហើយ ដោយគ្រោងចំណាយថវិកាប្រមាណ ១០ម៉ឺនដុល្លារ និងចាប់ផ្តើមសាងសង់នាខែមីនា ឆ្នាំ២០១៩ ខាងមុខនេះ។
លោក ណុប ហេង ប្រធានមន្ទីរសាធារណការ និងដឹកជញ្ជូនខេត្តព្រះសីហនុ បានឱ្យដឹងថា ស្ពានដែកឆ្លងផ្លូវនេះ មានប្រវែង ២៤ម៉ែត្រ កំពស់ ៥,២ម៉ែត្រ និងទទឹង៣ម៉ែត្រ។ រថយន្តកុងតឺន័រ ក៏អាចរត់ក្រោមស្ពាននេះបានដែរ។ ស្ពាននេះនឹងអាចជួយសម្រួលការកកស្ទះ និងហានិភ័យដល់កម្មករ-កម្មការិនីបានមួយកម្រិតដែរ៕
