អ្នកប្រើប្រាស់យានយន្តដឹកជញ្ជូនធុនធ្ងន់គ្រប់ប្រភេទដែលមិនចូលថ្លឹងនៅស្ថានីយជញ្ជីងតាមបណ្តាញផ្លូវត្រូវពិន័យអន្តរការណ៍ជាប្រាក់១លានរៀល។ ជាមួយគ្នានេះ អ្នក ដឹកជញ្ជូនទំនិញលើផ្លូវថ្នល់ផ្ទុកទម្ងន់លើសកម្រិតកំណត់ ក៏ត្រូវរងការពិន័យអន្តរការណ៍ពី១០ម៉ឺន ទៅ១លានរៀលក្នុងទម្ងន់មួយតោនផងដែរ។ នេះបើច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ដែលអនុវត្តចាប់ពីថ្ងៃទី១០ ខែកក្កដា តទៅ។មាត្រា ៦០ នៃច្បាប់ស្តីពីវិសោធនកម្មច្បាប់ស្តីពីផ្លូវថ្នល់បានចែងថា អ្នកប្រើប្រាស់យានយន្តដឹកជញ្ជូនធុនធ្ងន់ ដែលដឹកជញ្ជូនទំនិញលើផ្លូវថ្នល់មិនចូលថ្លឹងនៅស្ថានីយជញ្ជាំងតាមបណ្តាញផ្លូវ ត្រូវពិន័យអន្តរការណ៍ជាប្រាក់ចំនួន ១ ០០០ ០០០ (មួយលាន) រៀល។ ក្នុងករណីដែលទទួលរងនូវការពិន័យអន្តរការណ៍ម្តងរួចហើយ តែនៅបន្តប្រព្រឹត្តបទល្មើសម្តងទៀត ក្នុងរយៈពេល១២ខែ (មួយឆ្នាំ) ត្រូវពិន័យអន្តរការណ៍ជាប្រាក់ទ្វេដង។ ចំពោះ អ្នកប្រើប្រាស់យានយន្តដឹកជញ្ជូនធុនធ្ងន់ ដែលដឹកជញ្ជូនទំនិញលើផ្លូវថ្នល់ ផ្ទុកទម្ងន់លើសពី ៥ទៅ១០ ភាគរយ នៃទម្ងន់កំណត់ គឺត្រូវរើទំនិញចេញហើយរងពិន័យអន្តរការណ៍ ១០ម៉ឺនរៀល ក្នុងទម្ងន់មួយតោន។ លើសពីនេះ អ្នកប្រើប្រាស់យានយន្ត ត្រូវបានអាជ្ញាធដកនិងព្យួរបណ្ណបើកបរចំនួន១០ថ្ងៃថែមទៀត។ ក្នុងច្បាប់ដដែលបានចែងថា អ្នកប្រើប្រាស់យានយន្តដឹកជញ្ជូនធុនធ្ងន់ដែលដឹកជញ្ជូនទំនិញលើផ្លូវថ្នល់ផ្ទុកទម្ងន់លើសពី១០ទៅ២០ភាគរយ នៃទម្ងន់កម្រិតកំណត់ គឺក្រៅពីរើទំនិញចេញហើយនោះ ត្រូវរងពិន័យអន្តរការណ៍២០ម៉ឺនរៀល ក្នុងទម្ងន់មួយតោន។ អ្នកប្រើប្រាស់ឡានដឹកទំនិញលើសទម្ងន់នោះ ក៏ត្រូវអាជ្ញាធរដកនិងព្យួរបណ្ណបើកបរ ចំនួន៦ខែ។ ករណីអ្នកបើកបរផ្ទុកទំនិញលើសទម្ងន់លើសពី២០ទៅ៣០ភាគរយត្រូវពិន័យអន្តរការណ៍ជាប្រាក់ចំនួន ៣០ម៉ឺនរៀល ក្នុងទម្ងន់មួយតោន និងដកនិងព្យួរបណ្ណបើកបរ ៦ខែផងដែរ។ អ្នកប្រើប្រាស់យានយន្តដឹកជញ្ជូនធុនធ្ងន់ដែលដឹកជញ្ជូនទំនិញលើផ្លូវថ្នល់ផ្ទុកទម្ងន់លើសពី៣០ ទៅ៤០ ភាគរយ ត្រូវពិន័យអន្តរការណ៍៥០ម៉ឺនរៀល ក្នុងទម្ងន់មួយតោន និងត្រូវព្យួរបណ្ណបើកបរ ៩ខែ។ អ្នកប្រើប្រាស់យានយន្តដឹកជញ្ជូនធុនធ្ងន់ដែលដឹកជញ្ជូនទំនិញលើផ្លូវថ្នល់ផ្ទុកទម្ងន់លើសពី ៤០ ទៅ៥០ ភាគរយត្រូវរងពិន័យអន្តរការណ៍ ៨០ម៉ឺនរៀល ក្នុងទម្ងន់មួយតោន និងត្រូវព្យួរបណ្ណបើកបរ ក្នុងរយៈពេល១ឆ្នាំ។ បើអ្នកបើកបរផ្ទុកទំនិញលើសទម្ងន់ចាប់ពី៥០ភាគរយឡើងទៅ ត្រូវពិន័យអន្តរការណ៍ជា ១លានរៀលក្នុងទម្ងន់មួយតោន និងត្រូវព្យួរបណ្ណបើកបរក្នុងរយៈពេលមួយឆ្នាំផងដែរ។ « ក្នុងករណីមានអំពើល្មើសលើការផ្ទុកទម្ងន់សរុប និងអំពើល្មើសលើការផ្ទុកទម្ងន់អតិបរមានៃភ្លៅនោះ ត្រូវធ្វើការពិន័យអន្តរការណ៍ទាំងពីរករណី។»។ នេះបើតាមខ្លឹមចំណុចទី៧ ក្នុងមាត្រា ៦០ នៃច្បាប់ស្តីពីវិសោធនកម្មច្បាប់ស្តីពីផ្លូវថ្នល់។ ច្បាប់ដដែលបានចែងថា ៖ « ក្នុងករណីអ្នកទទួលរងនូវការពិន័យអន្តរការណ៍ម្តងរួចហើយចំពោះបទល្មើសដែលបានកំណត់ក្នុងខាងលើ តែនៅបន្តប្រព្រឹត្តបទល្មើសម្តងទៀត ក្នុងរយៈពេលមួយឆ្នាំ ត្រូវពិន័យអន្តរការណ៍ ចំនួន២លានរៀលក្នុងទម្ងន់មួយតោន និងត្រូវព្យួរលិខិតអនុញ្ញាតឱ្យធ្វើអាជីវកម្មដឹកជញ្ជូនមួយឆ្នាំ។»។ កម្ពុជា ធ្វើវិសោធនកម្មច្បាប់ស្តីពីផ្លូវថ្នល់ឡើង ក្នុងគោលដៅពង្រឹងការគ្រប់គ្រង ថែទាំ និងអភិវឌ្ឍហេដ្ឋារចនាសម្ព័ន្ធផ្លូវថ្នល់។ ការកែសម្រួលនេះក៏ដើម្បីឆ្លើយតបនឹងការវិវត្តសង្គម-សេដ្ឋកិច្ច សំណូមពរវិស័យឯកជន និងធានាការធ្វើចរាចរណ៍ប្រកបដោយសុវត្ថិភាពខ្ពស់ កាត់បន្ថយគ្រោះថ្នាក់ ព្រមទាំងលើកកម្ពស់ប្រសិទ្ធភាពការដឹកជញ្ជូន។ វិសោធនកម្មច្បាប់ផ្លូវថ្នល់ដែលត្រូវបានប្រកាសដាក់អនុវត្តនៅថ្ងៃទី១០ ខែកក្កដា គឺត្រូវបានធ្វើឡើងតាមសំណើបន្ទាន់របស់សម្តេចនាយករដ្ឋមន្ត្រី ហ៊ុន ម៉ាណែត ដែលបានដាក់លិខិតស្នើសុំទៅ សម្តេច ឃួន សុដារី ប្រធានរដ្ឋសភា កាលពីថ្ងៃទី៨ ខែមិថុនា ឆ្នាំ២០២៦៕