ការពិនិត្យវឌ្ឍនភាពការងារកែសម្រួលប្រកាសអន្តរក្រសួង លើការប្រមូលចំណូលមិនមែនសារពើពន្ធពីសេវាសាធារណៈ និងការពិន័យ របស់ក្រសួងសាធារណការ និងដឹកជញ្ជូន ទីស្តីការក្រសួង៖ ថ្ងៃទី១៣ ខែកុម្ភៈ ឆ្នាំ២០២៦ ឯកឧត្តម សុន សុខកេង អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំស្តីពីការពិនិត្យលើវឌ្ឍនភាពការងាររៀបចំ ចងក្រង កែសម្រួល និងបន្ថែមកម្រងសេវាសាធារណៈរបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងសំណង់កំពង់ផែ ដោយមានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសនៃអគ្គនាយកដ្ឋានរដ្ឋបាល និងហិរញ្ញវត្ថុ និងអគ្គនាយកដ្ឋានជំនាញ ជាច្រើនរូប។ កិច្ចប្រជុំនេះ បានពិភាក្សា និងពិនិត្យលើការកែសម្រួល និងបន្ថែមថ្មីនៃកម្រងសេវាសាធារណៈរបស់អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងសំណង់កំពង់ផែ ព្រមទាំងបានណែនាំឱ្យផ្ទៀងផ្ទាត់លម្អិតបន្ថែមលើកម្រងសេវាសាធារណៈនីមួយៗរបស់អគ្គនាយកដ្ឋាន ដើម្បីធានាថាសេចក្ដីព្រាងកម្រងសេវាសាធារណៈ និងការពិន័យថ្មីរបស់ក្រសួងសាធារណការ និងដឹកជញ្ជូន មានលិខិតបទដ្ឋានគតិយុត្តគាំទ្រគ្រប់គ្រាន់ និងមានភាពសមស្របទៅតាមទម្រង់កំណត់ក្នុងប្រកាសលេខ ១៤៥ សហវ.ប្រក.អគហ របស់ក្រសួងសេដ្ឋកិច្ច និងហិរញ្ញវត្ថុ។ ឯកឧត្តមប្រធានអង្គប្រជុំ បានណែនាំឱ្យក្រុមការងារទាំងអស់ បន្តសហការគ្នាយ៉ាងជិតស្និទ្ធិបន្ថែមទៀត ដើម្បីធ្វើយ៉ាងណាបញ្ចប់ការងាររៀបចំកែសម្រួលប្រកាសអន្តរក្រសួង ដែលពាក់ព័ន្ធនឹងការប្រមូលចំណូលមិនមែនសារពើពន្ធពីសេវាសាធារណៈ និងការពិន័យនេះឱ្យបានឆាប់រហ័ស៕