ក្រសួងសាធារណការ និងដឹកជញ្ជូន រៀបចំពិធីបុណ្យកឋិនទានមហាសាមគ្គី ដង្ហែទៅកាន់វត្តព្រែកអំបិល ស្ថិតនៅភូមិព្រែកអំបិល ឃុំព្រែកអំបិល ស្រុកស្អាង ខេត្តកណ្តាល ទីស្តីការក្រសួង៖ នារសៀលថ្ងៃសុក្រ ទី២៤ ខែតុលា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោកជំទាវ រួមជាមួយថ្នាក់ដឹកនាំ និងមន្ត្រីរាជការក្រោមឱវាទក្រសួង បានមូលមតិគ្នាជាឯកច្ឆ័ន្ធប្រារព្ធធ្វើបុណ្យកឋិនទានមហាសាមគ្គីរបស់ក្រសួងសាធារណការ និងដឹកជញ្ជូន ដង្ហែទៅកាន់វត្តព្រែកអំបិល ស្ថិតនៅភូមិព្រែកអំបិល ឃុំព្រែកអំបិល ស្រុកស្អាង ខេត្តកណ្តាល ក្នុងឱកាសដែលប្រជាពលរដ្ឋជាពុទ្ធសាសនិកជនទូទាំងព្រះរាជាណាចក្រកម្ពុជា កំពុងប្រារព្វពិធីបុណ្យកឋិនទានប្រកបដោយសទ្ធាជ្រះថ្លាក្នុងព្រះពុទ្ធសាសនា។ ពិធីបុណ្យកឋិនទានមហាសាមគ្គីនេះ បានចាប់ផ្តើមប្រារព្វឡើងនៅរសៀលថ្ងៃសុក្រ ទី២៤ ខែតុលា ឆ្នាំ២០២៥ ដើម្បីប្រារព្ធពិធីសូត្រមន្ត ថ្វាយធូប ទៀន និងផ្កាភ្ញី បូជាព្រះពុទ្ធរូប និងទីសក្ការៈ និងធ្វើពិធីនមស្សការព្រះរតនត្រ័យ សមាទានសីល និមន្តព្រះភិក្ខុសង្ឃ ស្វាធ្យាយព្រះបរិត្ត ប្រសិទ្ធពរជ័យ សិរីសួស្តី និងនិមន្តព្រះសង្ឃទេសនា ដោយ សម្តេចព្រះឧត្តមវង្សា គូ សុភាព គណៈមហានិកាយ នៃព្រះរាជាណាចក្រកម្ពុជា។ លុះព្រឹកថ្ងៃសៅរ៍ ទី២៥ ខែតុលា ឆ្នាំ២០២២ វេលាម៉ោង ៧ព្រឹក ឯកឧត្តមរដ្ឋមន្ត្រី ប៉េង ពោធិ៍នា និងលោកជំទាវ រួមជាមួយឯកឧត្តម លោកជំទាវ អស់លោក លោកស្រី ជាអ្នកផ្តើមបុណ្យទាំងអស់ នឹងដង្ហែអង្គកឋិនទានមហាសាមគ្គី ពីទីស្ដីការក្រសួង ឆ្ពោះទៅកាន់វត្តព្រែកអំបិល ស្រុកស្អាង ខេត្តកណ្តាល ដើម្បីវេរប្រគេនព្រះភិក្ខុសង្ឃដែលគង់ចាំព្រះវស្សាអស់ត្រីមាសជាកិច្ចបង្ហើយបុណ្យ៕