ក្រសួងសាធារណការ និងដឹកជញ្ជូន រៀបចំវគ្គបណ្តុះបណ្តាល ស្តីពី “ជំនាញជាអ្នកកាន់កម្មវិធី” ដល់បណ្ដាអង្គភាពរដ្ឋបាលកណ្ដាលរបស់ក្រសួង ទីស្តីការក្រសួង៖ នាថ្ងៃសុក្រ ទី២៦ ខែធ្នូ ឆ្នាំ២០២៥ ក្រសួងសាធារណការ និងដឹកជញ្ជូន បានរៀបចំវគ្គបណ្តុះបណ្តាល ស្តីពី “ជំនាញជាអ្នកកាន់កម្មវិធី” ដែលមានសិក្ខាកាមចូលរួមប្រមាណ ៣៥រូប មកពីបណ្ដាអង្គភាពរដ្ឋបាលកណ្ដាលរបស់ក្រសួង។ វគ្គបណ្តុះបណ្តាលនេះ ត្រូវបានរៀបចំឡើងក្នុងគោលបំណង ដើម្បីពង្រឹង និងកសាងសមត្ថភាពមន្រ្ដីរាជការបង្គោលដែលមានតួនាទីជាអ្នកកាន់កម្មវិធីនៅតាមបណ្ដាអង្គភាពរដ្ឋបាលកណ្ដាលរបស់ក្រសួង នូវចំណេះដឹង ជំនាញ និងការអនុវត្ដល្អៗដែលចាំបាច់ក្នុងការងារពិធីការ និងការកាន់កម្មវិធីជាតិ និងអន្ដរជាតិ កម្មវិធីប្រជុំ និងសិក្ខាសាលានានារបស់ក្រសួងសាធារណការ និងដឹកជញ្ជូន។ គួរបញ្ជាក់ផងដែរថាវគ្គបណ្ដុះបណ្ដាលនេះ ត្រូវបានបើករួមគ្នា និងផ្សារភ្ជាប់ជាមួយវគ្គបណ្តុះបណ្តាល ស្តីពីប្រសិទ្ធភាពនៃការប្រាស្រ័យទាក់ទងនៅក្នុងវិស័យរដ្ឋបាលសាធារណៈ និងការអនុវត្តនីតិវិធីទំនាក់ទំនងរដ្ឋបាលផ្លូវការក្រសួង ដែលរៀបចំដោយអគ្គនាយកដ្ឋានរដ្ឋបាល និងហិរញ្ញវត្ថុ នៃក្រសួងសាធារណការ និងដឹកជញ្ជូន កាលពីថ្ងៃទី១១ ខែធ្នូ ឆ្នាំ២០២៥ កន្លងទៅ។ ជាក្ដីរំពឹងទុក សិក្ខាកាមដែលបានចូលរួមអាចយកជំនាញ ចំណេះដឹង និងបទពិសោធន៍ដែលទទួលបានក្នុងវគ្គបណ្ដុះបណ្ដាលនេះទៅអនុវត្ដបន្ដ។ ជាចុងបញ្ចប់ វគ្គបណ្ដុះបណ្ដាលបានបញ្ចប់ប្រកបដោយជោគជ័យ និងទទួលបានការចូលរួមយ៉ាងសកម្មពីសំណាក់សិក្ខាកាម ចំពោះមេរៀន និងលំហាត់អនុវត្ដន៍ផ្សេងៗ៕