ជំនួបពិភាក្សាការងារលើកិច្ចសហការពាក់ព័ន្ធនឹងការរៀបចំរបាយការណ៍ ស្តីពីការវាយតម្លៃលើផលប៉ះពាល់នៃសេចក្តីព្រាងលិខិតបទដ្ឋានគតិយុត្ត ក្នុងវិស័យសាធារណការ និងដឹកជញ្ជូន ទីស្តីការក្រសួង៖ នាថ្ងៃចន្ទ ទី២០ ខែតុលា ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន ទទួលបន្ទុកកិច្ចការនីតិកម្ម និងជាប្រធានក្រុមការងារវាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន បានអញ្ជើញទទួលជួបពិភាក្សាការងារជាមួយ លោកស្រី Tamsin MCSORLEY ប្រធានកម្មវិធីអន្តជាតិ និង លោកស្រី Zoe Dayan អ្នកជំនាញកែទម្រង់ច្បាប់ជាន់ខ្ពស់ តំណាងស្ថានទូតអង់គ្លេសប្រចាំនៅកម្ពុជា លើកិច្ចសហការពាក់ព័ន្ធនឹងការរៀបចំរបាយការណ៍ ស្តីពីការវាយតម្លៃលើផលប៉ះពាល់នៃសេចក្តីព្រាងលិខិតបទដ្ឋានគតិយុត្ត (Regulatory Impact Assessment – RIA) ក្នុងវិស័យសាធារណការ និងដឹកជញ្ជូន ដោយមានការចូលរួមពី ឯកឧត្តមអនុរដ្ឋលេខាធិការ ឯកឧត្តម លោកជំទាវអគ្គនាយក លោកលោកស្រីអគ្គនាយករង លោកប្រធាន អនុប្រធាននាយកដ្ឋាន និងមន្ត្រីជំនាញពាក់ព័ន្ធផងដែរ។ ជំនួបពិភាក្សានេះបានផ្លាស់ប្តូរយោបល់ និងសិក្សាស្វែងយល់ពីគ្នាទៅវិញទៅមក ដើម្បីមានកិច្ចសហការការងាររវាងក្រសួងសាធារណការ និងដឹកជញ្ជូន និងស្ថានទូតអង់គ្លេសប្រចាំនៅកម្ពុជា លើការៀបរៀបចំរបាយការណ៍វាយតម្លៃលើផលប៉ះពាល់នៃលិខិតបទដ្ឋានគតិយុត្តរបស់ក្រសួងសាធារណការ និងដឹកជញ្ជូន។ យោងតាមអនុក្រឹត្យលេខ ១៧០ អនក្រ.បក ចុះថ្ងៃទី២៣ ខែកក្កដា ឆ្នាំ២០២៤ ស្តីពីការដាក់ឱ្យអនុវត្តគោលការណ៍ណែនាំស្តីពីនីតិវិធី និងវិធាននៃការតាក់តែសេចក្តីព្រាងច្បាប់ និងលិខិតបទដ្ឋានគតិយុត្តផ្សេងទៀត របាយការណ៍វាយតម្លៃលើផលប៉ះពាល់នៃលិខិតបទដ្ឋានគតិយុត្ត(RIA) គឺឯកសារផ្លូវការដែលត្រូវភ្ជាប់ជាមួយសេចក្តីព្រាងច្បាប់ក្នុងវិស័យហិរញ្ញវត្ថុ សង្គមកិច្ច និងបរិស្ថាន ដើម្បីបង្ហាញពីផលប៉ះពាល់វិជ្ជមាន និងអវិជ្ជមានរបស់សេចក្តីព្រាងច្បាប់ ឬលិខិតបទដ្ឋានគតិយុត្ត៕