កិច្ចប្រជុំពិភាក្សាត្រៀមរៀបចំកិច្ចប្រជុំក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី រយៈពេល៩ខែ ឆ្នាំ២០២៥ ក្រោមកិច្ចដឹកនាំពី ឯកឧត្តម ឈួន វិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី រាជធានីភ្នំពេញ៖ នាថ្ងៃសុក្រ ទី២៩ ខែសីហា ឆ្នាំ២០២៥ ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរីបានអញ្ជើញដឹកនាំកិច្ចប្រជុំពិភាក្សាត្រៀមរៀបចំកិច្ចប្រជុំក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី រយៈពេល៩ខែ ឆ្នាំ២០២៥ ដោយមានការអញ្ជើញចូលរួមពី ឯកឧត្តម អនុប្រធានក្រុមការងារ សមាជិក សមាជិកា នៃក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងមន្ត្រីពាក់ព័ន្ធផងដែរ។ កិច្ចប្រជុំនេះធ្វើឡើង ដើម្បីពិនិត្យលើវឌ្ឍនភាពការងារសម្រេចបានជាលទ្ធផលនូវសមិទ្ធផលក្នុងខេត្ត ដែលបានអភិវឌ្ឍកន្លងមក ការត្រៀមរៀបចំកិច្ចប្រជុំបូកសរុបការងាររយៈពេល៩ខែនៅខេត្ត ការរៀបចំវេទិកាសាធារណៈតាមស្រុក ក្រុង និងរៀបចំទិសដៅការងារអាទិភាពនាពេលបន្ទាប់ ដើម្បីធានាបានប្រសិទ្ធភាព ក្នុងការអភិវឌ្ឍ ប្រកបដោយសុខដុមនីយកម្ម ស្របតាមគោលនយោបាយរបស់រាជរដ្ឋាភិបាល អភិវឌ្ឍនៅតំបន់ភាគឦសានប្រទេស។ ឯកឧត្តមប្រធានក៏បានលើកទឹកចិត្តក្រុមការងាររាជរដ្ឋាភិបាលចុះមូលដ្ឋានទាំងអស់ ឱ្យបន្តខិតខំប្រឹងប្រែងអនុវត្តការងារ ឱ្យមានប្រសិទ្ធភាពខ្ពស់ ដើម្បីសម្រេចឱ្យបានជោគជ័យលើគ្រប់ការងារ ដែលស្ថិតនៅក្រោមសមត្ថកិច្ចរបស់ខ្លួន ស្របតាមគោលដៅកំណត់ និងកម្មវិធីនយោបាយរបស់រាជរដ្ឋាភិបាល៕