គណៈកម្មាធិការគ្រប់គ្រងធនធានខ្សាច់ចុះពិនិត្យករណីបូមខ្សាច់ក្នុងភូមិសាស្ត្រក្រុងអរិយក្សត្រ ខេត្តកណ្ដាល កណ្ដាល៖ នារសៀលថ្ងៃពុធ ថ្ងៃទី៩ ខែកក្កដា ឆ្នាំ២០២៥ ឯកឧត្តម ចៅ សុភៈភិបាល អគ្គនាយកប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន និងជាសមាជិកនៃលេខាធិការដ្ឋាន នៃគណៈកម្មាធិការគ្រប់គ្រងធនធានខ្សាច់ (គ.ធ.ខ.) បានចូលរួមចុះពិនិត្យករណីបូមខ្សាច់ក្នុងភូមិសាស្ត្រ សង្កាត់ព្រែកតាកូវ និងសង្កាត់ព្រែកលួង ក្រុងអរិយក្សត្រ ខេត្តកណ្តាល ដឹកនាំដោយឯកឧត្តម ស៊ិន វិសិទ្ធ អនុរដ្ឋលេខាធិការ ក្រសួងធនធានទឹក និងឧតុនិយម ដោយមានការចូលរួមពីតំណាងក្រសួងបរិស្ថាន ក្រសួងរ៉ែ និងថាមពល អភិបាលរងក្រុងអរិយក្សត្រ លោក-លោកស្រីចៅសង្កាត់ និងមន្ត្រីបច្ចេកទេសពាក់ព័ន្ធជាច្រើនរូប។ ការចុះបេសកកម្មនេះ គណៈកម្មាធិការគ្រប់គ្រងធនធានខ្សាច់បានចុះពិនិត្យដល់ទីតាំងបូមខ្សាច់ចំនួនពីរកន្លែងនៅកណ្តាលទន្លេ ព្រមទាំងបានជួបពិភាក្សាជាមួយតំណាងប្រជាពលរដ្ឋក្រុងអរិយក្សត្រ និងទទួលយកសំណើ និងសំណូមពរ ដើម្បីយកមកពិភាក្សា និងបន្តតាមនីតិវិធី។ សូមជម្រាបថា លេខាធិការដ្ឋាននៃគណៈកម្មាធិការគ្រប់គ្រងធនធានខ្សាច់ (គ.ធ.ខ.) មានសមាសជិកសរុបចំនួន២២រូប មានតំណាងមកពីក្រសួងស្ថាប័នពាក់ព័ន្ធមួយចំនួនរួមមាន៖តំណាងពីក្រសួងបរិស្ថាន ក្រសួងរ៉ែ និងថាមពល ក្រសួងសេដ្ឋកិច្ច និងហិរញ្ញវត្ថុ ក្រសួងធនធានទឹក និងឧតុនិយម ដោយមានភារកិច្ចសម្របសម្រួល និងទំនាក់ទំនងជាមួយបណ្តាក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិដែលជាសមាជិក គ.ធ.ខ. និងចុះត្រួតពិនិត្យ តាមដានការធ្វើអាជីវកម្មធនធានខ្សាច់ពាក់ព័ន្ធនឹងធនធានទឹក និងបច្ចេកទេសបូមខ្សាច់ ស្របតាមបទដ្ឋានបច្ចេកទេសជលវិទ្យា និងជលគតិ៕