សិក្ខាសាលាផ្សព្វផ្សាយ “ ការអភិវឌ្ឍស្ថាប័នដើម្បីពង្រឹងសេវាអនាម័យប្រកបដោយបរិយាបន្ន ក្នុងទីក្រុងសៀមរាប” សៀមរាប៖ នាថ្ងៃព្រហស្បតិ៍ ទី២៩ ខែមករា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងសិក្ខាសាលាផ្សព្វផ្សាយ “ ការអភិវឌ្ឍស្ថាប័នដើម្បីពង្រឹងសេវាអនាម័យប្រកបដោយបរិយាបន្ន ក្នុងទីក្រុងសៀមរាប” ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងមជ្ឈមណ្ឌលទឹកស្អាត និងអនាម័យសកល (GWSC) តំណាងក្រសួងសេដ្ឋកិច្ចនិងហិរញ្ញវត្ថុ តំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងរដ្ឋបាលខេត្ត និងរដ្ឋបាលក្រុងសៀមរាប តំណាងមន្ទីរសាធារណការ និងដឹកជញ្ជូន ខេត្តសៀមរាប / អង្គភាពគ្រប់គ្រងប្រព័ន្ធចម្រោះទឹកកខ្វក់សៀមរាប តំណាងមន្ទីរពាក់ព័ន្ធ តំណាងរដ្ឋាករទឹកស្វយ័តសៀមរាប តំណាងប្រតិបត្តិករស្ថានីយប្រព្រឹត្តកម្មសំណល់ភក់បង្គន់ ក្នុងក្រុងសៀមរាប តំណាងប្រតិបត្តិករបូមលូ និងដឹកជញ្ជូនសំណល់ភក់បង្គន់ក្នុងខេត្តសៀមរាប និងតំណាងដៃគូអភិវឌ្ឍន៍នានា។ សិក្ខាសាលានេះរៀបចំឡើងក្នុងគោលបំណងដើម្បីផ្សព្វផ្សាយជូនដល់ស្ថាប័ន និងដៃគូពាក់ព័ន្ធទាំងអស់ក្នុងខេត្តសៀមរាប អំពីលទ្ធផលនៃការអនុវត្តគម្រោង “ការអភិវឌ្ឍស្ថាប័នដើម្បីពង្រឹងសេវាអនាម័យប្រកបដោយបរិយាបន្ន ក្នុងទីក្រុងសៀមរាប” ដែលមានការគាំទ្រថវិកាពីមូលនិធិ Bill & Melinda Gates Foundation ហើយសហការដឹកនាំដោយ មជ្ឈមណ្ឌលទឹកស្អាត និងអនាម័យសកល (GWSC) ជាមួយនឹងអង្គការ GRET និងក្រុមហ៊ុន ISPL ក្នុងការគាំទ្រដល់អាជ្ញាធរពាក់ព័ន្ធ ជាពិសេសអង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាប ដើម្បីអភិវឌ្ឍសេវាអនាម័យក្នុងក្រុងសៀមរាប ដោយបានផ្តោតលើផ្នែកសំខាន់ៗដូចជា ៖ ១.)ការរៀបចំកិច្ចសន្យាផ្អែកលើការអនុវត្តការងារសម្រាប់សេវាស្ដារភក់បង្គន់ រវាងអាជីវករបូមលូ និងអង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាប ២.)ការរៀបចំដាក់បញ្ចូលកម្រៃសេវាប្រើប្រាស់ប្រព័ន្ធលូទៅក្នុងវិក្កយបត្រទឹកស្អាត ៣.)ការកែលម្អប្រព័ន្ធគ្រប់គ្រង ទិន្នន័យអនាម័យ៕