កំពត ៖ ក្នុងរយៈពេលជាង៣ខែនៃការបើកសាកល្បង កំពង់ផែទេសចរណ៍អន្តរជាតិខេត្តកំពតទទួលបានភ្ញៀវទេសចរឆ្លងកាត់ចំនួន៧ពាន់នាក់ ។នេះបើតាមប្រសាសន៍របស់លោកប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន នៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំពង់ផែទេសចរណ៍អន្តរជាតិខេត្តកំពតនៅព្រឹកថ្ងៃទី ២១ មេសា ឆ្នាំ ២០២៥ ។លោកបន្តថា កំពង់ផែទេសចរណ៍អន្តរជាតិកំពតអាចទទួលនាវាទេសចរណ៍ផ្ទុកអ្នកដំណើរប្រមាណជាង៣០០នាក់ ចូលចតដោយសុវត្ថិភាព ហើយកំពង់ផែនេះ នឺងតភ្ជាប់ដឹកជញ្ជូនអ្នកដំណើរតាមផ្លូវទឹកពីខេត្តកំពតទៅកាន់បណ្ដាខេត្តមាត់សមុទ្រមួយចំនួនទៀត ដូចជាខេត្តកែប ខេត្តព្រះសីហនុ កោះកុង និងបណ្ដាកោះក្នុងដែនសមុទ្រនៃប្រទេសកម្ពុជាផងដែរ ។ អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈ ប៊ុនថាំ អ៊ិចប្រេស និងជាប្រធានក្រុមប្រឹក្សាភិបាល កំពង់ផែទេសចរណ៍អន្តរជាតិខេត្តកំពត កន្លងមកកាលពីថ្ងៃទី៦ ខែមករា ឆ្នាំ២០២៥ បានចុះហត្ថលេខាស្តីពីកិច្ចសហប្រតិបត្តិការ ក្នុងការអនុវត្ត ប្រតិបត្តិការកំពង់ផែទេសចរណ៍អន្តរជាតិខេត្តកំពត និងសេវាកម្មទូកល្បឿនលឿន រវាងក្រុមហ៊ុន វីរៈ ប៊ុនថាំ អេចប្រេស ជាមួយក្រុមហ៊ុន ខេអាយធីភី ឌីវេឡុបម៉ិន បុត្រសម្ព័ន្ធរបស់ក្រុមហ៊ុន AZ Group ។ អ្នកឧកញ៉ា ជឿថាកិច្ចសហការនេះ នឹងក្លាយជាច្រកទ្វារផ្លូវសមុទ្រអន្តរជាតិដ៏សំខាន់ ដែលរំពឹងទទួលអ្នកដំណើរភ្ញៀវទេសចរណ៏ជាតិ និងអន្តរជាតិប្រមាណ ១លាននាក់ នៅក្នុងឆ្នាំ២០២៦ ។ នៅក្នុងឱកាសនៃពិធីសម្ពោធដាក់ឱ្យប្រើប្រាស់នូវកំពង់ផែទេសចរណ៍អន្តរជាតិខេត្តកំពត សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា កំពង់ផែទេសចរណ៍អន្តរជាតិកំពតនេះ គឺជាសមិទ្ធផលរបស់ជាតិទី១ ក្រោយពិធីបុណ្យចូលឆ្នាំ ៕