កាលពីថ្ងៃទី ១៥ ខែមីនា ឆ្នាំ ២០២៥ ថ្មីៗ នេះ លោក ទ្រី ណារ៉េត អភិបាលរង នៃគណៈអភិបាលខណ្ឌកំបូល បានដឹកនាំការិយាល័យសាធារណការដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ និងក្រុមការងារសង្កាត់កំបូល ចុះធ្វើការជួសជុលផ្លូវបេតុងសំបុកមាន់ផ្លូវលេខ ៤២ ស្ថិតនៅភូមិអំពិល សង្កាត់កំបូល ខណ្ឌកំបូល រាជធានីភ្នំពេញ។លោក ទ្រី ណារ៉េត អភិបាលរងខណ្ឌ បញ្ជាក់ថា ការជួសជុលបេតុងសំបុកមាន់ដែលរងការខូចខាតយូរមកហើយនេះ គឺជាគម្រោងអភិវឌ្ឍន៍របស់ខណ្ឌក្នុងឆ្នាំនេះ និងបន្ទាប់ពីទទួលបានការផ្ដល់ការណែនាំពីលោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល អញ្ជើញចុះពិនិត្យជាក់ស្ដែងនាពេលកន្លងមក ឃើញថាមានការខូចខាតខ្លាំង តម្រូវឱ្យជួសជុលជាប្រញាប់ ដើម្បីសម្រួលចរាចរណ៍ធ្វើដំណើរជូនប្រជាពលរដ្ឋ។លោក ជា យឿន ប្រធានការិយាល័យសាធារណការ ដឹកជញ្ជូន អនាម័យ បរិស្ថាន និង សណ្ដាប់ធ្នាប់សាធារណៈ ក៏បានឱ្យដឹងដែរថា កាលពីចុងឆ្នាំ ២០២៤ លោកបានដឹកនាំមន្ត្រីការិយាល័យចុះវាស់ផ្លូវបេតុងជង្ហុកសំបុកមាន់ដែលគ្រោងនឹងជួសជុល និងលើកជាផែនការចុះជួសជុលជាបន្តបន្ទាប់។ជាមួយគ្នានោះ អាជ្ញាធរ ក៏សូមអធ្យាស្រ័យ និងយោគយល់ចំពោះការរំខានដល់ប្រជាពលរដ្ឋក្នុងការធ្វើដំណើរ ខណៈកំពុងជួសជុល និងសូមបង្កើនការប្រុងប្រយ័ត្នពេលបើកបរ៕