កម្មវិធី “ពិព័រណ៍ការសិក្សា នៅប្រទេសកាណាដា” ពី ណតហ្វៀល អេន អាស៊ូស៊ីអេត ប្រទេសកាណាដា (Northefield & Associates Canadian Education Fair) ជូនដល់មន្ត្រីរាជការ និស្សិត និងសាធារណជន ទីស្តីការក្រសួង៖ នាព្រឹកថ្ងៃសុក្រ ទី៨ ខែសីហា ឆ្នាំ២០២៥ ឯកឧត្តម ប្រាងហង្ស សេរីរិទ្ធ នាយកវិទ្យាស្ថានតេជោសែនសាធារណការ និងដឹកជញ្ជូន អញ្ជើញជាអធិបតីភាពបើកកម្មវិធី “ពិព័រណ៍ការសិក្សាពីប្រទេសកាណាដា” (Northfield & Associates Canadian Education Fair) ពី (Northfield & Associates) ជូនដល់មន្ត្រីរាជការក្រសួង មន្រ្តីវិទ្យាស្ថាន សិស្ស-និស្សិត និងសាធារណជនទូទៅ។ កម្មវិធីពិព័រណ៍នេះ ត្រូវបានរៀបចំក្នុងគោលបំណងផ្សព្វផ្សាយ អំពីឱកាសសិក្សានៅប្រទេសកាណាដា ដល់មន្ត្រីរាជការ និស្សិត និងសាធារណជន ព្រមទាំងរបៀបដាក់ពាក្យ និងតម្រូវការក្នុងការដាក់ពាក្យស្នើសុំការសិក្សា ផងដែរ។ ក្រៅពីនេះ អ្នកចូលរួម ក៏មានឱកាសជួបសួរជាមួយសាកលវិទ្យាល័យពីប្រទេសកាណាដា ដោយផ្ទាល់។ ថ្លែងសុន្ទរកថាបើកកម្មវិធី ឯកឧត្តមនាយកវិទ្យាស្ថាន បានមានប្រសាសន៍ថា ការអប់រំ និងបណ្ដុះបណ្ដាលធនធានមនុស្ស គឺជាចូលរួមចំណែកអនុវត្តយុទ្ធសាស្រ្តបញ្ចកោណរបស់រាជរដ្ឋាភិបាល ក៏ដូចជាផែនការយុទ្ធសាស្ត្រ របស់ក្រសួងសាធារណការ និងដឹកជញ្ជូន។ ការរៀបចំកម្មវិធីខាងលើ គឺពិតជាមានសារៈសំខាន់និងមានអត្ថប្រយោជន៍ ដល់មន្ត្រីរាជការ និស្សិត និងសាធារណជន ក្នុងន័យដើម្បីបង្កើនការយល់ដឹង ការផ្លាស់ប្តូរវប្បធម៌ ជំរុញឱកាសក្នុងការសិក្សានៅក្រៅប្រទេស ពិសេសទទួលបានទំនាក់ទំនងជាមួយស្ថាប័នអប់រំល្បីៗពីប្រទេសកាណាដា៕