ពង្រឹងសមត្ថភាពមន្ត្រីរាជការរបស់ក្រសួងសាធារណការ និងដឹកជញ្ជូន តាមរយៈការបណ្តុះបណ្តាល ស្តីពីផែនការថវិកាប្រចាំឆ្នាំ និងការអនុវត្តថវិកាកម្មវិធី ខេត្តកំពត៖ នាថ្ងៃចន្ទ ទី២ ខែធ្នូ ឆ្នាំ២០២៤ ឯកឧត្តម វ៉ាស៊ឹម សុរិយា អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងវគ្គបណ្តុះបណ្តាល ស្តីពីផែនការថវិកាប្រចាំឆ្នាំ និងការអនុវត្តថវិកាកម្មវិធី ដោយមានការអញ្ជើញចូលរួមពីថ្នាក់ដឹកនាំក្រសួង និងសិក្ខាកាមប្រមាណ ១៤០ រូប អញ្ជើញមកពីបណ្តាអង្គភាពថវិកាថ្នាក់កណ្តាល និងអង្គភាពថវិកាថ្នាក់មូលដ្ឋាន របស់ក្រសួងសាធារណការ និងដឹកជញ្ជូន។ វគ្គបណ្តុះបណ្តាលនេះ មានគោលបំណងផ្តល់ជាមូលដ្ឋាន និងចំណេះដឹងបន្ថែមពាក់ព័ន្ធនឹងការអនុវត្តថវិកាកម្មវិធី និងវិធីសាស្ត្របង្កើតរជ្ជទេយ្យបុរេប្រទាន និងការអនុវត្តកិច្ចលទ្ធកម្ម ជូនដល់មន្ត្រីជំនាញនៃគ្រប់អង្គភាពថវិកា ដែលស្ថិតក្រោមអាណាប័កក្រសួងសាធារណការ និងដឹកជញ្ជូន ដើម្បីធានាប្រសិទ្ធភាព ស័កិ្តសិទ្ធិភាព តម្លាភាព និងគណនេយ្យភាព ក្នុងការអនុវត្តថវិការបស់អង្គភាពថវិកាទាំងអស់។ ឆ្លៀតក្នុងឱកាសនោះ ឯកឧត្តមអនុរដ្ឋលេខាធិការ បានបញ្ជាក់ថា វគ្គបណ្តុះបណ្តាលនេះ ត្រូវបានរៀបចំឡើងស្របទិសដៅកែទម្រង់របស់ក្រសួងដែលបានដាក់ចេញ ជាពិសេសស្របតាមចក្ខុវិស័យដឹកនាំគិតគូរវែងឆ្ងាយ និងអនុសាសន៍ណែនាំដ៏ខ្ពង់ខ្ពស់របស់ ឯកឧត្តមរដ្ឋមន្ត្រី ក្រសួងសាធារណការ និងដឹកជញ្ជូន ដែលបានណែនាំឱ្យគ្រប់អង្គភាពទាំងអស់របស់ក្រសួង យកចិត្តទុកដាក់បណ្តុះបណ្តាលពង្រឹងសមត្ថភាពមន្ត្រីរាជការលើគ្រប់ជំនាញពាក់ព័ន្ធទាំងអស់។ ទន្ទឹមនឹងនេះផងដែរ ឯកឧត្តមអនុរដ្ឋលេខាធិការ បានផ្តាំផ្ញើដល់សិក្ខាកាមទាំងអស់ ខិតខំស្វែងយល់ យកចិត្តទុកដាក់ស្តាប់ លើកជាសំណួរ និងសំណូមពរឱ្យបានផុសផុល និងយកចំណេះទាំងអស់នេះប្រើប្រាស់ជាលទ្ធផលប្រកបដោយប្រសិទ្ធភាពខ្ពស់៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube