កិច្ចប្រជុំអន្តរក្រសួង ដើម្បីពិនិត្យ និងពិភាក្សាលើសេចក្តីព្រាងច្បាប់ ស្ដីពីវិសោធនកម្មច្បាប់ស្ដីពីផ្លូវថ្នល់ ទីស្ដីការគណៈរដ្ឋមន្ត្រី៖ នាព្រឹកថ្ងៃទី៣០ ខែកញ្ញា ឆ្នាំ២០២៥ ឯកឧត្តម ប៉ាល់ ចន្ទតារា រដ្ឋលេខាធិការ បានដឹកនាំគណៈប្រតិភូក្រសួង ចូលរួមកិច្ចប្រជុំអន្តរក្រសួង ដើម្បីពិនិត្យ និងពិភាក្សាបន្ថែមលើសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ ក្រោមការដឹកនាំដោយ ឯកឧត្តម ឆឺយ រឿន រដ្ឋលេខាធិការ នៃទីស្តីគណៈរដ្ឋមន្ត្រី ដោយមានការអញ្ជើញចូលរួមពីថ្នាក់ដឹកនាំក្រសួង តំណាងអន្តរក្រសួងស្ថាប័ន ក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ គណៈកម្មការភាសាវិទ្យាខ្មែរ នៃទីស្តីគណៈរដ្ឋមន្ត្រី និងលោក លោកស្រីជាមន្ត្រីជំនាញពាក់ព័ន្ធជាច្រើនរូប។ កិច្ចប្រជុំនេះ រៀបចំឡើងក្នុងគោលបំណងដើម្បី ពិនិត្យ ពិភាក្សា ប្រមូលធាតុចូលបន្ថែមពីក្រសួងស្ថាប័ន ពាក់ព័ន្ធលើមាត្រាមួយចំនួនដែលបានចែងក្នុងសេចក្តីព្រាងច្បាប់ស្តីពីវិសោធនកម្មច្បាប់ស្តីពីផ្លូវថ្នល់ សំដៅធានាថាសេចក្តីព្រាងវិសោធនកម្មនេះ ប្រកបដោយអត្ថន័យមានខ្លឹមសារ ត្រឹមត្រូវ គ្រប់ជ្រុងជ្រោយ មានសង្គតិភាព និងឆ្លើយតបទៅនឹងការស្នើសុំពីវិស័យឯកជន ព្រមទាំងអាចយកទៅអនុវត្តតាមភាពរីកចម្រើនសេដ្ឋកិច្ចសង្គមជាក់ស្តែងនាពេលបច្ចុប្បន្ន និងទៅអនាគត៕