ជំនួបពិភាក្សាការងារជាមួយក្រុមហ៊ុន Ree NET Co., Ltd. និងក្រុមហ៊ុន Furuken Factory Co., Ltd. លើគម្រោងប្រព័ន្ធចម្រោះទឹកកខ្វក់ នៅស្រុកក្រឡាញ់ ខេត្តសៀមរាប ក្រោមជំនួយរបស់ទីភ្នាក់ងារសហប្រតិបត្តិការអន្តរជាតិជប៉ុន(JICA) ថ្ងៃព្រហស្បតិ៍ ៦រោច ខែស្រាពណ៍ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៨ ខែសីហា ឆ្នាំ២០២២ នៅទីស្តីការក្រសួង ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ បានទទួលជួបពិភាក្សាការងារជាមួយក្រុមហ៊ុន Ree NET Co., Ltd. និងក្រុមហ៊ុន Furuken Factory Co., Ltd. លើគម្រោងប្រព័ន្ធចម្រោះទឹកកខ្វក់ នៅស្រុកក្រឡាញ់ ខេត្តសៀមរាប ក្រោមជំនួយរបស់ទីភ្នាក់ងារសហប្រតិបត្តិការអន្តរជាតិជប៉ុន(JICA) ដោយមានការចូលរួមពីមន្ត្រីជំនាញពាក់ព័ន្ធរបស់អគ្គនាយកដ្ឋាន។ គោលបំណងនៃជំនួបនេះ ផ្តោតជាសំខាន់លើការពិនិត្យវឌ្ឍនភាពគម្រោង និងសកម្មភាពបន្តលើការចុះកិច្ចព្រមព្រៀង និងអនុស្សារណៈយោគយល់(MOU) រវាងភាគីពាក់ព័ន្ធ និងការស្នើសុំថវិកាពី JICA ដើម្បីអនុវត្តគម្រោង។ សូមបញ្ជាក់ថា៖ គម្រោងខាងលើនឹងសាងសង់ប្រព័ន្ធចម្រោះទឹកកខ្វក់ ដោយប្រើប្រាស់បច្ចេកវិទ្យា Artificial Wetland Technology ដែលជាបច្ចកវិទ្យាថ្មី ត្រូវការទំហំដីតូច មិនប៉ះពាល់បរិស្ថាន ចំណាយតិច និងមានសោភ័ណភាពល្អ៕