(ក្រចេះ)៖ លោក វ៉ា ថន អភិបាលខេត្តក្រចេះ និងលោក ង្វៀន វ៉ាន់យ៉ាញ់ អនុប្រធានគណៈកម្មាធិការ ខេត្តប៊ិញយឿង នៃសាធារណរដ្ឋ សង្គមនិយមវៀតណាម នៅថ្ងៃទី០៦ ខែមេសា ឆ្នាំ២០២២ បានអញ្ជើញសម្ពោធដាក់ឲ្យដំណើរការជាផ្លូវការ នូវស្ពានបេតុងសរសៃដែក ប្រវែង៣៦ម៉ែត្រ ដែលមានឈ្មោះថា ស្ពានមិត្តភាពក្រចេះ-ប៊ិញយឿង (ស្ពានអណ្តែងដូន) ស្ថិតនៅព្រំប្រទល់រវាងសង្កាត់ក្រចេះ និងសង្កាត់ក្រគរ ក្រុងក្រចេះ។ លោក សាំង ប៊ុនថេន ប្រធានមន្ទីរសាធារណៈការ និងដឹកជញ្ជូនខេត្ត បានឲ្យដឹងថា ផ្តើមចេញពីការទំនាក់ទំនងមិត្តភាព ជាប្រពៃណី លើកិច្ចសហប្រតិបត្តិការ ស្ថិតស្ថេរយូរអង្វែង មិត្តភាពជិតស្និទ្ធ រវាងខេត្តប៊ិញយឿង នៃសាធារណរដ្ឋសង្គមនិយមវៀតណាម និងខេត្តក្រចេះ នៃព្រះរាជាណាចក្រកម្ពុជា ដើម្បីរួមចំណែកបង្កើនសកម្មភាព សហប្រតិបតិ្តការជួយឧបត្ថម្ភគ្នាទៅវិញទៅមក ក្នុងការអភិវឌ្ឍន៍រួម របស់អាជ្ញាធរទាំងពីរ។ លោកបន្ដថា គណៈកម្មាធិការប្រជាជនខេត្តប៊ិញយឿង បានឧបត្ថម្ភថវិកាជួយដល់រដ្ឋបាលខេត្តក្រចេះ ក្នុងការសាងសង់ឡើងវិញ ស្ពានអណ្តែងដូន និងប្រគល់ការងារសាងសង់ជូនមន្ទីរសាធារណការ និងដឹកជញ្ជូនខេត្តក្រចេះ លើទំហំ និងបរិមាណការងារ ស្របតាមបទដ្ឋានបច្ចេកទេស នៃការសាងសង់ស្ពានអណ្ដែងដូន អំពីបេតុងសរសៃដែកថ្មី ប្រវែង៣៦ម៉ែត្រ ទទឹង៨.២ម៉ែត្រ ស្ថិតនៅលើផ្លូវខេត្តលេខ៣៧៧ មកជំនួសស្ពានចាស់ ដែលកាលដើមឡើយ ជាប្រភេទដែកអ៊ីក្រាលឈើ ប្រវែង៣៧.៦ម៉ែត្រ ទទឹង៥ម៉ែត្រ មានសភាពចាស់ទ្រុឌទ្រោមយ៉ាងខ្លាំង ពុកផុយគ្រឿងបង្គុំ ជើងទម្រក្រោម និង ក្តារក្រាលបណ្តោយ-ទទឹងទាំងស្រុង ពិបាកក្នុងការធ្វើដំណើរ ហើយអាចធ្វើចរាចរណ៍ បានតែមួយគន្លងរថយន្តប៉ុណ្ណោះ មិនអាចជៀសគ្នាបាន ដោយទទឹងតូចចង្អៀត។ ថ្លែងស្វាគមន៍រវាងលោក វ៉ា ថន និងលោក ង្វៀន វ៉ាន់យ៉ាញ់ ដោយផ្អែកលើទំនាក់ទំនង ចំណងមិត្តភាព សាមគ្គីភាព កិច្ចសហប្រតិបត្តិការ រវាងប្រទេសទាំងពីរកម្ពុជា វៀតណាម មានភាពល្អប្រសើរ និយាយជារួមខេត្តក្រចេះ ខេត្តប៊ិញយឿង និងខេត្តប៊ិញភឿក កន្លងមកទទួលបានលទ្ធផលគួរឲ្យកត់សម្គាល់។ លោកអភិបាលខេត្ត បានឲ្យដឹងថា ក្នុងកិច្ចសហប្រតិបត្តិការលើកវិស័យសេដ្ឋកិច្ច សង្គមកិច្ច វប្បធម៌ ខេត្តក្រចេះ និងភាគីវៀតណាម តែងតែបានបង្កលក្ខណៈងាយស្រួល ដល់ប្រជាពលរដ្ឋនៅតាមតំបន់ព្រំដែន អាជីវករ ពាណិជ្ជករបណ្តានិយោគគិនឆ្លងកាត់ ក្នុងការទិញ លក់ដូរទំនិញ និងការសម្របសម្រួលសួរសុខទុក្ខញាតិមិត្ត និងចេញ-ចូលព្យាបាលជំងឺ។ លោកថា ជាពិសេសក្នុងបរិបទដែលប្រទេសក្នុងពិភពលោកទាំងមូល បាននឹងជួបប្រទះជំងឺកូវីដ-១៩ ធ្វើឲ្យបណ្តាខេត្តនៃព្រះរាជាណាចក្រកម្ពុជា ជាប់ព្រំដែន និងខេត្ត នៃសាធារណរដ្ឋសង្គមនិយមវៀតណាម បានយកចិត្តទុកដាក់ខ្ពស់ រួមគ្នាទប់ស្កាត់ និងការការពារពីការចម្លងជំងឺកូវីដ-១៩ ដោយរក្សាបាននូវសុខសន្តិភាព សណ្ដាប់ធ្នាប់សាធារណៈ និងសុវត្ថិភាពនៅតាមតំបន់ព្រំដែន គ្រប់គ្រងបង្កាទប់ស្កាត់បទល្មើសនាំមនុស្សឆ្លងដែនខុសច្បាប់ រួមគ្នាបង្កាទប់ស្កាត់ការឆ្លងរាលដាលនៃជំងឺកូវីដ-១៩ នៅតាមតំបន់ព្រំដែន សំដៅរួមគ្នាដោះស្រាយជីវភាពរស់នៅរបស់ប្រជាពលរដ្ឋ នៅតំបន់ព្រំដែនក្នុងកំឡុងពេលឆ្លងរាលដាលជំងឺកូវីដ-១៩ បានល្អប្រសើរ។ លោកទាំងពីរ មានការសង្ឃឹម និងជឿជាក់យ៉ាងមុតមាំថា ស្ពានមិត្តភាពក្រចេះ-ប៊ិញយឿង ត្រូវបានសម្ពោធដាក់ឲ្យប្រើប្រាស់ នឹងបង្កលក្ខណៈងាយស្រួល ក្នុងតភ្ជាប់ការធ្វើគមនាគមន៍ ការដឹកជញ្ជូនទំនិញ និងការធ្វើដំណើររបស់ប្រជាជនពីទីប្រជុំជន នៅផ្នែកកណ្តាលនៃក្រុងក្រចេះ ទៅបណ្តាស្រុក-ឃុំ និងតំបន់កេរ្តិ៍ដំណែលប្រវត្តិសាស្ត្រ និងតំបន់ទេសចរណ៍ធម្មជាតិនានា រស់នៅខេត្តក្រចេះ ក៏ដូចជាការតភ្ជាប់រវាងខេត្តក្រចេះ ជាមួយតំបន់ភូមិភាគឦសាន នៃព្រះរាជាណាចក្រកម្ពុជា ជាមួយច្រកព្រំដែនអន្តរជាតិ កម្ពុជា-ឡាវ និងកម្ពុជា-វៀតណាម៕