នៅក្នុងពិធីសន្និបាតបូកសរុបលទ្ធផលការងារឆ្នាំ ២០២១ និងលើកទិសដៅ ការងារឆ្នាំ២០២២ នៅថ្ងៃទី ២៧ ខែមករា ឆ្នាំ២០២២នេះ ឯកឧត្ដមរដ្ឋមន្រ្ដី ស៊ុន ចាន់ថុល បានឱ្យដឹងបន្ថែមថា ការដឹកជញ្ជូនតាមផ្លូវដែក ត្រូវបានថយចុះ ដោយសារកូវីដ-១៩ ។ដោយក្នុងនោះ ការដឹកជញ្ជូនទំនិញមានចំនួនជាង ៩៩ម៉ឺនតោន បានថយចុះ ១០,៥៥% និងបរិមាណដឹកជញ្ជូនអ្នកដំណើរសរុប មានចំនួន ជាង ៣ពាន់នាក់ បានថយចុះ ៨៥,៥៤% បើធៀបនិងឆ្នាំ២០២០ ។ ឯកឧត្ដមរដ្ឋមន្រ្ដីបានគូសបញ្ជាក់ថា ត្បិតការដឹកជញ្ជូនទំនិញ និងអ្នកដំណើរតាម ផ្លូវដែកមានការថយចុះនៅក្នុង ឆ្នាំ២០២១ ប៉ុន្ដែនៅឆ្នាំដដែលនេះ ទំនិញដែលបានឆ្លងកាត់កំពង់ផែស្វយ័តក្រុងព្រះសីហនុ មានចំនួនប្រមាណ ៦,៩លានតោន កើនឡើង ៥,៩៩% និងទទួលបានចំណូលសរុប ចំនួនប្រមាណ ៣៧៣ប៊ីលានរៀល កើនឡើង ១៧,៦៤% ធៀបនឹងការអនុវត្តឆ្នាំ២០២០។ ដោយឡែក ចំពោះ ទំនិញ និងប្រេងឥន្ធនៈ និងហ្គាសឆ្លងកាត់កំពង់ផែស្វយ័តភ្នំពេញ មានចំនួនសរុបប្រមាណ ៤,២លានតោន កើនឡើង ១៣,៤១% និងចំណូលសរុបមានចំនួនប្រមាណ ១៣៨ប៊ីលានរៀល កើនឡើង ១៤,៣៧% បើធៀបនឹងឆ្នាំ២០២០ ។ តាមការបញ្ជាក់ពីឯកឧត្ដមរដ្ឋមន្រ្ដី ចំពោះការងារផ្លូវដែក ក្រសួងបាននិងកំពុងរៀបចំអនុក្រឹត្យស្តីពីការគ្រប់គ្រងដីចំណីផ្លូវដែក និងចំណុចឆ្លងកាត់រវាងផ្លូវដែក និងផ្លូវថ្នល់ និងបានកំណត់ព្រំដីស្ថានីយរថភ្លើងជាមួយមន្ទីររៀបចំដែនដីនគរូបនីយកម្ម និងសំណង់តាមខេត្ត ក្រុង ក៏ដូចជា បាននិងកំពុងជួសជុល និងថែទាំផ្លូវដែកទាំងពីរទិស ប្រវែងសរុប ៦៤៩ គ.ម ដើម្បីធានានូវសុវត្ថិភាពក្នុងការដឹកជញ្ជូនទំនិញ និងអ្នកដំណើរ ៕