ដើម្បីធានាបានភាពរឹងមាំ និងជាប់បានយូរ នូវកំណាត់ជាតិលេខ៣ ចេញពីកំពតទៅវាលរេញ ប្រវែង ២០ គីឡូម៉ែត្រ រាជរដ្ឋាភិបាលបានសម្រេចធ្វើការចាក់គ្រឹះក្រោមដីរួច ទើបធ្វើការសាងសង់ ដោយសារនៅតំបន់នោះគឺជាដីភក់ដែលមាជម្រៅពី១៧ ទៅ ១៨ ម៉ែត្រឯណោះ។ ដូច្នេះមិនអាចសាងសង់ជាប់បានល្អឡើយបើមិនមានការចាក់គ្រឹះទេនោះ។ តាមការលើកឡើងរបស់ឯកឧត្ដម ទេសរដ្ឋមន្រ្ដី រដ្ឋមន្រ្ដី នៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ កាលពីថ្ងៃទី២៧ ខែមករា ឆ្នាំ២០២២ បានឲ្យដឹងថា ការសាងសង់ជាតិពីកំពតទៅវាលរេញដែលមានប្រវែង៥៤ គីឡូម៉ែត្របានសង់ចប់សព្វគ្រប់ ៣៤ គីឡូម៉ែត្រហើយ ខណៈ២០ គឺឡូម៉ែត្រទៀត ក្រសួងសេដ្ឋកិច្ច និងហិរញ្ញវត្ថុ ជាមួយធនាគារពិភពលោក បានឯកភាពគ្នាដកចេញពីគម្រោងវិញ ដើម្បីរៀបចំសាងសង់នេះឲ្យបានត្រឹមត្រូវបានលក្ខណៈបច្ចេកទេស។ ឯកឧត្ដមបន្ដថា ជាការពិតនៅវាលរេញនេះ ត្រូវបានចែកចេញជាពីរផ្នែក ដោយមួយផ្នែកប្រវែង៥គីឡូម៉ែត្រយើងត្រូវតែធ្វើការចាក់គ្រឹះនៅក្រោមដី។ ដោយសារតែពេលឃួងមើល ១៧ ទៅ ១៨ ម៉ែត្រគឺសុទ្ធតែភក់ទាំងអស់ អ៊ីចឹងទោះជាយើងធ្វើយ៉ាងណាក៏មិនជាប់ដែរ។ ដូច្នេះលុះត្រាតែយើងចាក់គ្រឹះ ឬភាសាសាមញ្ញថា ធ្វើក្រោមដី ៥ គីឡូម៉ែត្រ ទើប ៥ គីឡូម៉ែត្រនេះលែង ខណៈ ១៥ គីឡូម៉ែត្រទៀតយើងត្រូវកែគ្រឹះហើយចាក់បេតុង។ ឯកឧត្ដមទេសរដ្ឋមន្រ្ដីបន្ថែមថា ពេលនេះយើងបានឯកភាពគ្នាចប់សព្វគ្រប់ដែរ នឹងត្រៀមថវិកាមកពីប្រទេសចិនដើម្បីសាងសង់ ២០ គីឡូម៉ែត្រនេះឲ្យបានជាប់ទៅតាមស្ដង់ដារ៕