ត្បូងឃ្មុំ៖ ផ្លូវជាតិលេខ ៧ ក្នុងភូមិសាស្ត្រខេត្តត្បូងឃ្មុំ កំពុងរងការខូចខាតជាច្រើនកន្លែង និងកំពុងត្រូវជួសជុលឡើងវិញ តែការជួសជុលនោះ ត្រូវបានគេមើលឃើញថា មិនមានគុណភាពទាល់តែសោះ ព្រោះក្រោយការជួសជុល កន្លែងខ្លះបានខូចវិញភ្លាមៗ។ ការនេះ ត្រូវបានប្រជាពលរដ្ឋមួយចំនួនលើកឡើងថា ធ្វើឱ្យតែរួចពីដៃ មិនគិតពីគុណភាពទាល់តែសោះ។ ប្រជាពលរដ្ឋរស់នៅឃុំជីរោទី២ ស្រុកត្បូងឃ្មុំ សុំមិនបញ្ចេញឈ្មោះ បានឱ្យដឹងថា ផ្លូវជាតិលេខ៧ ក្នុងភូមិសាស្ត្ររបស់គាត់ ប៉ុន្មានឆ្នាំមកនេះបានរងការខូចខាតជាច្រើនកន្លែង ហើយត្រូវបានក្រុមការងារបច្ចេកទេសចុះជួសជុលជាបន្តបន្ទាប់ តែហាក់មិនមានគុណភាពទាល់តែសោះ ខណៈកន្លែងខ្លះធ្វើហើយពេលព្រឹក ល្ងាចឡើងក៏ខូចលើសដើម។ ពលរដ្ឋបានដាក់ជាសំណួរថា មិនដឹងមកពីអ្នកធ្វើគ្មានគុណភាព ធ្វើឱ្យតែរួចពីដៃ ឬមកពីមានរថយន្តយន្តធំៗដឹកលើសទម្ងន់ ទើបធ្វើហើយខូចវិញភ្លាមបែបនេះ? ជុំវិញបញ្ហានេះ លោក ម៉ៅ ដុង នាយករដ្ឋបាលសាលាខេត្តត្បូងឃ្មុំ បានបញ្ជាក់ថា ការជួសជុលនេះ ជាគម្រោងរបស់ក្រសួងសាធារណការ និងដឹកជញ្ជូន មិនមែនជាគម្រោងរបស់ខេត្តទេ។ ដូច្នេះមិនពាក់ព័ន្ធនឹងខេត្តឡើយ។ ម្យ៉ាងវិញទៀត ការជួសជុលផ្លូវដែលគ្មានគុណភាពនេះ មិនមែនតែប្រជាពលរដ្ឋទេដែលរិះគន់ថា ធ្វើគ្មានគុណភាព សូម្បីតែថ្នាក់ដឹកនាំខេត្ត និងមន្ត្រីជាន់ខ្ពស់មកពីរាជធានីភ្នំពេញក៏ធ្លាប់លើកឡើងពីបញ្ហានេះដែរ តែការជួសជុលនៅតែបន្ត ទាំងគ្មានគុណភាព ពោលគឺ ធ្វើហើយខូចភ្លាមរបៀបនេះដដែលៗ៕