ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញដឹកនាំប្រតិភូក្រសួងចូលរួមដាក់កម្រងផ្កា គោរពវិញ្ញាណក្ខន្ធសពលោក វរសេនីយ៍ត្រី សែម គាលី មេបញ្ជាការរងកងអនុសេនាតូចទី១ កងល្បាតទី៥ កងការពារព្រំដែនលេខ ៥០៣ យោធភូមិភាគទី៥ ខេត្តកណ្តាល៖ នាល្ងាចថ្ងៃសុក្រ ទី១៩ ខែធ្នូ ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញដឹកនាំប្រតិភូក្រសួងចូលរួមសំណេះសំណាលជាមួយគ្រួសារវីរកងទ័ព លោកវរសេនីយ៍ត្រី សែម គាលី មេបញ្ជាការរងកងអនុសេនាតូចទី១ កងល្បាតទី៥ កងការពារព្រំដែនលេខ ៥០៣ យោធភូមិភាគទី៥ ដែលបានពលីនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីថ្ងៃពុធ ទី១៧ ខែធ្នូ ឆ្នាំ២០២៥ វេលាម៉ោង ៦:៣០នាទី (ព្រឹក) ក្នុងជន្មាយុ ៤៩ឆ្នាំ ក្នុងសមរភូមិ ក្នុងបុព្វហេតុការពារបូរណភាពទឹកដីកម្ពុជា។ ក្នុងនាមឯកឧត្តមរដ្ឋមន្រ្តី ព្រមទាំងថ្នាក់ដឹកនាំ និងមន្ត្រីរាជការនៃក្រសួងសាធារណការ និងដឹកជញ្ជូន មានសេចក្តីរន្ធត់ក្តុកក្តួលរំជួលចិត្តឥតឧបមាក្រោយពីបានទទួលដំណឹងដ៏សែនក្រៀមក្រំនេះ។ យើងខ្ញុំទាំងអស់គ្នាសូមចូលរួមរំលែកទុក្ខជាមួយក្រុមគ្រួសារ ចំពោះការបាត់បង់នូវសាច់ញាតិ ដែលជាវីរកងទ័ពក្លាហាន ជាទីគោរពស្រឡាញ់ដ៏ជ្រាលជ្រៅបំផុត និងប្រកបដោយព្រហ្មវិហារធម៌ដ៏ថ្លៃថ្លា ដែលកន្លងមក លោកវរសេនីយ៍ត្រី សែម គាលី ធ្លាប់មានគុណូបការៈខ្ពស់ចំពោះក្រុមគ្រួសារ ញាតិមិត្ត និងបងប្អូនទាំងអស់ ហើយនេះគឺជាការបាត់បង់នូវយោធិនស្នេហាជាតិដ៏អង់អាចក្លាហានមួយរូប ដែលតែងតែលះបង់កម្លាំងកាយចិត្ត ហ៊ានបូជាឈាមស្រស់ សាច់ស្រស់ ក្នុងកិច្ចការពារអធិបតេយ្យភាព បូរណភាពទឹកដី ដើម្បីសេចក្តីសុខក្សេមក្សាន្តរបស់ប្រជាជនកម្ពុជានៃយើង។ ឆ្លៀតក្នុងឱកាសនោះ ឯកឧត្តមរដ្ឋមន្រ្តីក៏បានចូលរួមក្នុងកម្មវិធីគោរពវិញ្ញាណក្ខន្ធ ព្រះគ្រូសិរីគុណញាណ អ៊ឹម សុខសាន្ត ព្រះចៅអធិការវត្តទឹកវិល (ចុងកោះ) ដែលប្រារព្ធឡើងនាពេលនោះ ផងដែរ៕