សិក្ខាសាលាផ្សព្វផ្សាយពីនីតិវិធីនៃការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត --- ថ្ងៃសុក្រ ៩រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២០ ខែធ្នូ ឆ្នាំ២០១៩ នៅទីស្តីការក្រសួងសាធារណការ និងដឹកជញ្ជូន លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្តមទេសរដ្ឋមន្រ្តី ស៊ុន ចាន់ថុល បានអញ្ជើញជាអធិបតីក្នុងសិក្ខាសាលាផ្សព្វផ្សាយនីតិវិធីនៃការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត ដោយមានការចូលរួមពីថ្នាក់ដឹកនាំអគ្គនាយកដ្ឋាន នាយកដ្ឋានពាក់ព័ន្ធ និងមន្ទីរសាធារណការ និងដឹកជញ្ជូនរាជធានី ខេត្តទាំង២៥។ សិក្ខាសាលានេះរៀបចំឡើងក្នុងគោលបំណងផ្សព្វផ្សាយនូវអនុក្រឹត្យស្តីពីការចុះបញ្ជីផ្តល់បណ្ណសម្គាល់យានជំនិះ និងបំពាក់ផ្លាកលេខសម្គាល់យានជំនិះ, ប្រកាសស្តីពីបែបបទ និងនីតិវិធីនៃការចុះបញ្ជីយានជំនិះ ការផ្តល់ផ្លាកលេខសម្គាល់យានជំនិះ និងការលុបយានជំនិះចេញពីបញ្ជីយានជំនិះ និងផ្សព្វផ្សាយផ្ទៃក្នុងឱ្យបានយល់អំពីបែបបទ និងនីតិវិធីនៃការចុះបញ្ជីលេខពិសេសផ្ទាល់ខ្លួន មុនពេលដាក់ដំណើរការជាផ្លូវការ។ ថ្លែងក្នុងសិក្ខាសាលានោះ លោកជំទាវរដ្ឋលេខាធិការ បានមានប្រសាសន៍ថា ការរៀបចំប្រព័ន្ធលក់លេខពិសេសផ្ទាល់ខ្លួននេះ ក្នុងគោលបំណងដើម្បីផ្តល់ជម្រើសជូនប្រជាពលរដ្ឋក្នុងការទិញលេខសម្រាប់ចុះបញ្ជីរថយន្ត និងស្របទៅនឹងនិយាមការអន្តរជាតិ ព្រមទាំងស្វែងរកចំណូលបន្ថែមជូនថវិកាជាតិ។ លោកជំទាវបានបន្តថា ក្រុមការងារបច្ចេកទេសក្រសួងសាធារណការ និងដឹកជញ្ជូន បានធ្វើទស្សនកិច្ចសិក្សានៅប្រទេសថៃ ទីក្រុងហុងកុង និងប្រទេសសឹង្ហបុរី ដើម្បីដកស្រង់យកបទពិសោធន៍ ក្នុងការអភិវឌ្ឍ និងរៀបចំប្រព័ន្ធគ្រប់គ្រងការលក់លេខ ដេញថ្លៃចុះបញ្ជីលេខពិសេសផ្ទាល់ខ្លួន។ លោកជំទាវរដ្ឋលេខាធិការ បានគូសបញ្ជាក់បន្ថែមថា ប្រព័ន្ធចុះបញ្ជីរថយន្តថ្មីនេះ នឹងផ្តល់ឱ្យម្ចាស់កម្មសិទ្ធិរថយន្ដ មានសិទ្ធិស្នើសុំរក្សាលេខចុះបញ្ជីលើរថយន្ដកំពុងប្រើប្រាស់សម្រាប់ចុះបញ្ជីលើរថយន្ដថ្មីរបស់ខ្លួនបាន, អាចរក្សាទុកជាកេរិ៍តមរតក, អាចធ្វើការចុះបញ្ជីជាសហកម្មសិទ្ធិ និងលេខចុះបញ្ជីពិសេសផ្ទាល់ខ្លួន ដែលអាចដាក់លេខ ឬ/និងអក្សរឡាតាំងមិនលើសពី ៨ខ្ទង់។ សូមបញ្ជាក់ផងដែរថា៖ ប្រព័ន្ធលក់លេខចុះបញ្ជីរថយន្តថ្មីនេះ ប្រទេសកម្ពុជា ស្ថិតនៅក្នុងលំដាប់លេខរៀងទី២ នៅក្នុងបណ្តាប្រទេសអាស៊ាន បន្ទាប់ពីប្រទេសសឹង្ហបុរីក្នុងការរៀបចំប្រព័ន្ធលក់ ដេញថ្លៃលេខចុះបញ្ជីរថយន្តតាមប្រព័ន្ធអនឡាញ និងលេខរៀងទី២ នៅអាស៊ីបន្ទាប់ពីហុងកុងដែលមានការលក់ ដេញថ្លៃលេខចុះបញ្ជីពិសេសផ្ទាល់ខ្លួននេះ ហើយការគណនា និងកំណត់តម្លៃចំពោះលេខពិសេសផ្ទាល់ខ្លួន គឺឈរលើមូលដ្ឋាន៖ ចំនួនតួកាន់តែតិច តម្លៃកាន់តែខ្ពស់, ពាក្យពេចន៍នៅក្នុងវចនានុក្រមអង់គ្លេស, លេខ 168, លេខ ឬ អក្សរ ដូចគ្នា, លេខ ឬ អក្សរ រៀងជាប់គ្នាតាមលំដាប់ឡើង, លេខ ឬ អក្សរ រៀងជាប់គ្នាតាមលំដាប់ចុះ, លេខ ឬ អក្សរមានលក្ខណៈឆ្លុះ និង លេខរៀងជាប់គ្នាជាចំនួនសេស ឬគូ នៃតួអក្សរនីមួយៗ៕