កិច្ចសម្ភាសន៍របស់  ឯកឧត្តមទេសរដ្ឋមន្រ្តី  ជាមួយក្រុមហ៊ុន MSA (Marketing Solution Asia)  ក្រោមប្រធានបទ  "រួមគ្នាដើម្បីកាត់បន្ថយគ្រោះថ្នាក់ចរាចរណ៍នៅកម្ពុជា  និងគាំទ្រដល់យុទ្ធនាការ  "ដើរដោយសុវត្ថិភាព" ---   ថ្ងៃអង្គារ ៨រោច ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៩ ខែវិច្ឆិកា ឆ្នាំ២០១៩ ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក  បានផ្តល់កិច្ចសម្ភាសន៍ជាមួយក្រុមហ៊ុន MSA (Marketing Solution Asia) នៅការិយាល័យឯកឧត្តមទេសរដ្ឋមន្រ្តីផ្ទាល់។   គណៈកម្មាធិការជាតិសុវត្ថិភាពចរាចរណ៍ផ្លូវគោក   សហការជាមួយក្រុមហ៊ុន  MSA នឹងរៀបចំយុទ្ធនាការលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក  ដើម្បីជំរុញនូវការយល់ដឹង សំដៅការកាត់បន្ថយនូវគ្រោះថ្នាក់ចរាចរណ៍ផ្លូវគោកនៅកម្ពុជា  ក្រោមប្រធានបទ   "ដើរដោយសុវត្ថិភាព" ដែលនឹងប្រព្រឹត្តទៅថ្ងៃអាទិត្យ ទី២៤ ខែវិច្ឆិកា ឆ្នាំ២០១៩ ដោយចេញដំណើរពីវត្តបទុមវត្តី  វេលាម៉ោង ០៧:០០ នាទីព្រឹក ឆ្ពោះទៅចូលរួមក្នុងទិវាអន្តរជាតិរំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោកលើកទី១៤  នៅបរិវេណមណ្ឌលកំសាន្តកោះពេជ្រ ។   នៅក្នុងកិច្ចសម្ភាសន៍ ឯកឧត្តមទេសរដ្ឋមន្រ្តី បានលើកឡើងថា គ្រោះថ្នាក់ចរាចរណ៍ផ្លូវគោកឆ្នាំ២០១៨  មានចំនួន ៣.៣៥២ករណី និងជនរងគ្រោះចំនួន ១១.៦៧០នាក់ ក្នុងចំណោមជនរងគ្រោះមានអ្នកស្លាប់ចំនួន ១.៨៧១នាក់(គិតជាមធ្យមមានអ្នកស្លាប់ច្រើនជាង ៥នាក់ ក្នុងមួយថ្ងៃ) និងរបួសធ្ងន់ ៣.៩៨៣នាក់ (គិតជាមធ្យមមានអ្នករបួសធ្ងន់ច្រើនជាង ១១នាក់ ក្នុងមួយថ្ងៃ)។ អ្នកស្លាប់បានថយចុះ៥,៣%  និងអ្នករបួសធ្ងន់ ១៧,៩% ធៀបនឹងឆ្នាំ២០១៧។ ក្នុងនោះ  មូលហេតុចំបងដែលបណ្តាលឱ្យមានគ្រោះថ្នាក់ចរាចរណ៍បង្កឡើងមានកត្តាមនុស្ស  កត្តាយានយន្ត  និងកត្តាផ្លូវថ្នល់  ការបើកបរហួសល្បឿនកំណត់ បើកបរវ៉ាជែងគ្នាក្នុងស្ថានភាពគ្រោះថ្នាក់  បើកបរមិនគោរពសិទ្ធិអាទិភាព បើកបរមិនប្រកាន់ស្តាំ  និងបើកបរក្រោមឥទ្ធិពលគ្រឿងស្រវឹង ជាដើម។   ឆ្លៀតក្នុងឱកាសនេះ  ឯកឧត្តមទេសរដ្ឋមន្រ្តី ក៏បានសំណូមពរ ដល់គ្រប់ក្រសួង  ស្ថាប័ន  រោងចក្រ  សហគ្រាស  ក្រុមហ៊ុនឯកជននានា ឱ្យចូលរួមចំណែកជំរុញនូវការផ្សព្វផ្សាយ  ការលើកកម្ពស់នូវសុវត្ថិភាពចរាចរណ៍ផ្លូវគោក ដល់មន្រ្តី  និងបុគ្គលិករបស់ខ្លួន  ស្របតាមអនុសាសន៍របស់ សម្តេចតេជានាយករដ្ឋមន្រ្តី "ថ្ងៃនេះ ថ្ងៃស្អែក កុំឱ្យមានគ្រោះថ្នាក់ចរាចរណ៍" ព្រមទាំងអំពាវនាវដល់  សិស្ស  និស្សិត  បងប្អូនប្រជាពលរដ្ឋទាំងអស់  ឱ្យអញ្ជើញចូលរួមឱ្យបានផុសផុលកម្មវិធី  "ដើរដោយសុវត្ថិភាព"  ។