បណ្តុះបណ្តាល និងផ្សព្វផ្សាយ ពីបច្ចេកទេសសំខាន់ៗ ក្នុងការជួសជុលថែទាំផ្លូវ និងការប្រើប្រាស់កម្មវិធីថែទាំផ្លូវ (ROAD CARE Mobile App) នៅខេត្តកំពង់ឆ្នាំង --- ថ្ងៃសុក្រ ១៣កើត ខែអស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១១ ខែតុលា ឆ្នាំ២០១៩ អគ្គនាយកដ្ឋានបច្ចេកទេស សហការជាមួយ នាយកដ្ឋានព័ត៌មានវិទ្យា និងទំនាក់ទំនងសាធារណៈ និងមន្ទីរសាធារណការ និងដឹកជញ្ជូនខេត្តកំពង់ឆ្នាំង បានបន្តធ្វើយុទ្ធនាការបណ្តុះបណ្តាល និងផ្សព្វផ្សាយ បច្ចេកទេសជួសជុលថែទាំផ្លូវ និងការប្រើប្រាស់កម្មវិធីថែទាំផ្លូវ (ROAD CARE Mobile App) នៅមន្ទីរសាធារណការ និងដឹកជញ្ជូនខេត្តកំពង់ឆ្នាំង ដែលមានអ្នកចូលរួម ៧៣ រូប ជាមន្រ្តីបច្ចេកទេសនៃមន្ទីរសាធារណការ និងដឹកជញ្ជូនខេត្តកំពង់ឆ្នាំង។ យុទ្ធនាការបណ្តុះបណ្តាលនេះ អាចអោយមន្រ្តីបច្ចេកទេសនៃមន្ទីរសាធារណការ និង ដឹកជញ្ជូនខេត្តកំពង់ឆ្នាំង បានយល់ដឹងបន្ថែមពី បច្ចេកទេសនៃការជួសជុលថែទាំផ្លូវ ក៏ដូចជាការប្រើប្រាស់កម្មវិធីថែទាំផ្លូវ (ROAD CARE Mobile App) ដែលអាចផ្ដល់ភាពងាយស្រួលក្នុងការឆ្លើយតបទំនាក់ទំនងទៅកាន់ប្រជាពលរដ្ឋ និងផ្សព្វផ្សាយដល់ប្រជាពលរដ្ឋក្នុងតំបន់អោយយល់ពីអត្ថប្រយោជន៍ និងវិធីប្រើប្រាស់ដើម្បីរាយការណ៍ផ្ទាល់ ពីស្ថានភាពគ្រលុកសំបុកមាន់ ដើម្បីធ្វើការជួសជុលបានទាន់ពេលវេលា កាត់បន្ថយគ្រោះថ្នាក់ចរាចរណ៍។ គោលបំណងសំខាន់ក្នុងបេសកកម្មនេះគឺការសាងសង់ និងថែទាំផ្លូវថ្នល់ឱ្យមានលក្ខណៈល្អប្រសើរសម្រាប់ប្រជាពលរដ្ឋ លុបបំបាត់ផ្លូវខូច និងជង្ហុកសំបុកមាន់តាមដងផ្លូវនានាក្នុងរាជធានី-ខេត្ត ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា។ គួរបញ្ជាក់ថា ខេត្តកំពង់ឆ្នាំងជាខេត្តទីពីរនៃយុទ្ធនាការ “បណ្តុះបណ្តាល និងផ្សព្វផ្សាយបច្ចេកទេសជួសជុលថែទាំផ្លូវ និងការប្រើប្រាស់កម្មវិធី ថែទាំផ្លូវ (ROAD CARE Mobile App)នេះ ក្រុមការងារនឹងបន្ដបេសកកម្មរបស់ខ្លួនទូទាំង ២៥រាជធានី-ខេត្ត” ក្រោមកិច្ចសហការគាំទ្រពីកម្មវិធីអភិវឌ្ឍសហប្រជាជាតិ ប្រចាំព្រះរាជាណាចក្រកម្ពុជា (UNDP)។ ទាញយកកម្មវិធីថែទាំផ្លូវ (ROAD CARE Mobile App)៖ - App Store: roadcare.mpwt.gov.kh/ios - Play Store: roadcare.mpwt.gov.kh/android ::: សម្រាប់ព័ត៌មានបន្ថែម សូមទំនាក់ទំនងមកកាន់លេខ៖ 085 92 90 90 / 015 92 90 90 / 067 92 90 90