នារសៀលថ្ងៃពុធ ១២រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែកញ្ញា ឆ្នាំ២០១៩ នេះនៅទីស្តីការក្រសួងសេដ្ឋកិច្ច និងហិរញ្ញវត្ថុ, ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃ “មូលនិធិគន្ធបុប្ផាកម្ពុជា” បានទទួលជួបសំណេះសំណាលជាមួយ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន និងសហការី ក្នុងឱកាសដែលឯកឧត្តមទេសរដ្ឋមន្រ្តីបាននាំមកនូវថវិកាបរិច្ចាគប្រចាំឆ្នាំរបស់មន្ត្រី និងអង្គភាពក្រោមឱវាទក្រសួងសាធារណការ និងដឹកជញ្ជូ​ន​ ចំនួន ៧៦ ០០៦ ០០០ (ចិតសិបប្រាំមួយលាន ប្រាំមួយពាន់) រៀល និងថវិកាដែលបានមកពីកម្មវិធីជិះកង់ដើម្បីសុខភាព-ត្រួតពិនិត្យផ្លូវ នៅខេត្តសៀមរាបកាលពីថ្ងៃទី១៦ ខែសីហា ឆ្នាំ២០១៩ កន្លងទៅ ចំនួន ៩៥ ៤៨២ (កៅសិបប្រាំពាន់ បួនរយប៉ែបសិបពីរ) ដុល្លារអាមេរិក មកបរិច្ចាគជូន “មូលនិធិគន្ធបុប្ផាកម្ពុជា” រួមទាំងថវិកាបរិច្ចាគផ្ទាល់របស់ឯកឧត្តមទេសរដ្ឋមន្រ្តីចំនួន ៥ ០០០ (ប្រាំពាន់) ដុល្លារអាមេរិក ផងដែរ។ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅ និងកោតសរសើរ ឯកឧត្តម ស៊ុន ចាន់ថុល និងសហការីទាំងអស់ចំពោះការផ្តល់វិភាគទានដ៏សប្បុរសធម៌ជូនមូលនិធិគន្ធបុប្ផាកម្ពុជា ដែលជាការឆ្លើយតបទៅនឹងការអំពាវនាវ និងលើកទឹកចិត្តពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ឱ្យបំផុសចលនាផ្សព្វផ្សាយ និងបន្តផ្តល់វិភាគទានសប្បុរសធម៌ តាមរយៈការចូលជាសមាជិករបស់មូលនិធិគន្ធបុប្ផាកម្ពុជា ក្នុងស្មារតី “ខ្មែរជួយខ្មែរ”។ ក្នុងឱកាសនោះ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី ក៍បានរំលឹកផងដែរអំពីសាវតានៃការបង្កើតមូលនិធិគន្ធបុប្ផាកម្ពុជា ក៍ដូចជាការរួមចំណែករបស់មូលនិធិគន្ធបុប្ផាស្វីស និងគុណបំណាច់ដែលមិនអាចកាត់ថ្លៃបានរបស់លោកសាស្រ្តាចារ្យវេជ្ជបណ្ឌិត Beat Richner។ ជាការឆ្លើយតប ឯកឧត្តម ទេសរដ្ឋមន្ត្រី ស៊ុន ចាន់ថុល បានសម្តែងការកោតសរសើរចំពោះរាជរដ្ឋាភិបាលកម្ពុជា ដែលតែងតែគិតគូរអំពីសុខទុក្ខរបស់ប្រជាពលរដ្ឋ និងជាពិសេសសុខុមាលភាពរបស់កុមារ តាមរយៈការបង្កើត មូលនិធិគន្ធបុប្ផាកម្ពុជា នេះឡើង ដើម្បីចូលរួមធានានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំងប្រាំទីតាំង។ ឯកឧត្តម ទេសរដ្ឋមន្ត្រី ក៏បានសម្តែងនូវសេចក្តីសោមនស្សរីករាយ ដែលបានរួមចំណែកក្នុងការគាំទ្រដល់ការគិតគូររបស់រាជរដ្ឋាភិបាលដើម្បីការងារមនុស្សធម៌នេះ និងសន្យាបន្ត និងបំផុសចលនាគាំទ្រ និងចូលរួមជាមួយមូលនិធិគន្ធបុប្ផាកម្ពុជា។ ជាចុងបញ្ចប់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានអំពាវនាវ និងបន្តលើកទឹកចិត្តថ្នាក់ដឹកនាំ និងមន្ត្រីគ្រប់លំដាប់ថ្នាក់នៃក្រសួងសាធារណការ និងដឹកជញ្ជូន ក៍ដូចជាក្រសួង-ស្ថាប័នរដ្ឋ ក្រុមហ៊ុន និងបណ្តាសាធារណជន ឱ្យរួមគ្នាធានានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំងប្រាំទីតាំង តាមរយៈការចូលរួមបរិច្ចាគ និងចូលជាសមាជិករបស់ មូលនិធិគន្ធបុប្ផាកម្ពុជា ទៅតាមលទ្ធភាព ដោយប្រកាន់ខ្ជាប់នូវស្មារតី និងគុណធម៌ “ខ្មែរជួយខ្មែរ” ដើម្បីភាពញញឹមរបស់កុមារដែលជាអនាគតដ៏ភ្លឺស្វាងរបស់កម្ពុជា និងដើម្បីការអភិវឌ្ឍន៍របស់កម្ពុជា។ ខ្លឹមសារដេីម៖​ https://www.facebook.com/211968309411715/posts/445986532676557