[CEN] - ស្ពានយោលស្ទឹងក្រញូង កាត់ផ្តាច់ទាំងស្រុង ដោយទឹកជំនន់ , អាជ្ញាធរស្រុកសំឡូត បង្ខំជន្លៀសពលរដ្ឋជាច្រើនគ្រួសារ ដើម្បីរកទីទួលមានសុវត្ថិភាព
2019-09-16
ទៅកាន់ទំព័រចុះផ្សាយក្នុង CEN
បាត់ដំបង៖ ទឹកជំនន់បានធ្វើឲ្យស្ពានយោលស្ទឹងក្រញូង រងការកាត់ផ្តាច់ទាំងស្រុងនៅមុននេះបន្តិច នៅពេលនេះលោកនិងក្រុមការងារកំពុងបន្តចុះពិនិត្យផលប៉ះពាល់លំនៅដ្ឋាន ឬផលដំណាំផ្សេងទៀតរបស់ប្រជាពលរដ្ឋហើយ អាជ្ញាធរស្រុកសំឡូត នៅព្រឹកនេះ បានបង្ខំចិត្តជម្លៀសប្រជាពលរដ្ឋជិត៣០គ្រួសារ ចេញពីលំនៅដ្ឋាន ទៅរកទីទួលមានសុវត្ថិភាពបណ្តោះអាសន្ន។លោក សើ ម៉េត អភិបាលស្រុកសំឡូតនៅថ្ងៃទី១៦ ខែកញ្ញា ឆ្នាំ២០១៩នេះបានឲ្យដឹងថា ទឹកភ្លៀងបន្តធ្លាក់យ៉ាងគំហុកពេញមួយយប់ទល់ភ្លឺ ចាប់តាំងព្រលប់ថ្ងៃទី១៥ កញ្ញាមកបានបង្កឲ្យឃុំចំនួន៤ក្នុងស្រុកសំឡូត រងការជន់លិច ពិសេសនៅតំបន់ទំនាបទីប្រជុំជនឃុំសំឡូត តាតោក ឃុំតាសាញ និងអូរតាទៀករបស់ស្រុកសំឡូត ខេត្តបាត់ដំបង ។
ជំនន់ទឹកភ្លៀងនៅតំបន់ជួរភ្នំស្ថិតនៅប៉ែកខាងលើ ស្រុកសំឡូតនេះ បានបង្ខំចិត្តធ្វើឲ្យអាជ្ញាធរស្រុកជាប់ព្រំដែនមួយនេះ ជម្លៀសប្រជាពលរដ្ឋចំនួន២៧គ្រួសារភ្លាមៗ ចេញពីលំនៅដ្ឋានជាបណ្តោះអាសន្ន ដើម្បីទៅរកទីទួលមានសុវត្ថិភាព។ អំណាចជំនន់ទឹកភ្លៀងហូរចាក់យ៉ាងគំហុកភ្លាមៗនេះ ធ្វើឲ្យប្រជាពលរដ្ឋប្រញាប់ប្រញាល់រំដោះបានត្រឹមតែខ្លួនប៉ុណ្ណោះ ដោយឡែកសម្ភារ ឬទ្រព្យសម្បត្តិសំខាន់ៗ មិនអាចយកចេញទាន់បានឡើយ។
លោក អភិបាលស្រុកសំឡូត បានបន្ថែមថា ជំនន់ត្រឹមរយៈពេលខ្លីបានធ្វើឲ្យស្ពានយោល ស្ទឹងក្រញូងរងការកាត់ផ្តាច់ទាំងស្រុង នៅមុននេះបន្តិច នៅពេលនេះលោកនិងក្រុមការងារកំពុងបន្តចុះពិនិត្យផលប៉ះពាល់លំនៅដ្ឋាន ឬផលដំណាំផ្សេងទៀតរបស់ប្រជាពលរដ្ឋ ប៉ុន្តែមកដល់ជិតម៉ោង១២.០០នាទីថ្ងៃដដែលនេះ ស្ថានភាពជំនន់បានធូរស្រាលបន្តិចវិញហើយ ដោយសារក្រុមការងារជំនាញមន្ទីរធនធានទឹក ឧតុនិយមបានបើកទ្វាទំនប់ទឹកទំហំធំ ដើម្បីឲ្យទឹកហូរចាក់ទៅផ្នែកខាងក្រោមនៃស្ទឹងសង្កែ ៕
