[Kley Kley News] - ក្រសួងសាធារណការ និងដឹកជញ្ជូន ពន្យារពេលដល់ហាងលក់យានយន្ត ក្នុងការចុះបញ្ជីជូនអ្នកទិញ
2017-07-07
ទៅកាន់ទំព័រចុះផ្សាយក្នុង Kley Kley News
ក្រសួងសាធារណការ និងដឹកជញ្ជូន បានសម្រេចពន្យារពេល ក្នុងការអនុញ្ញាតឲ្យគ្រប់ហាងលក់យានយន្តទាំងអស់ ចុះបញ្ជីយានយន្តជូនប្រជាពលរដ្ឋ ដែលជាអ្នកទិញ។ ពីមុន ក្រសួងសាធារណការ និងដឹកជញ្ជូន ធ្លាប់បានកំណត់យកថ្ងៃទី១ ខែកក្កដា ឆ្នាំ២០១៧ ដើម្បីឲ្យម្ចាស់ហាងលក់យានយន្តទាំងអស់ ត្រូវចុះបញ្ជីយានយន្ត ឬធ្វើប័ណ្ណសម្គាល់យានយន្ត ស្លាកលេខ ឬកាតគ្រី ជូនដល់អ្នកទិញ។ សេចក្តីជូនដំណឹងចុះថ្ងៃទី៣០ ខែមិថុនា ឆ្នាំ២០១៧ របស់ក្រសួងសាធារណការ និងដឹកជញ្ជូន បង្ហាញថា ការសម្រេចពន្យារពេលក្នុងការអនុញ្ញាតឲ្យគ្រប់ហាងលក់យានយន្តទាំងអស់ ចុះបញ្ជីយានយន្តជូនប្រជាពលរដ្ឋ ដែលជាអ្នកទិញយានយន្តនោះ គឺក្រសួងនឹងធ្វើការជូនដំណឹងអំពីកាលបរិច្ឆេទថ្មី នៅពេលក្រោយ។ ចំពោះមូលហេតុនៃការពន្យារពេលនេះ ត្រូវបានក្រសួងសាធារណការ និងដឹកជញ្ជូន លើកឡើងថា ដោយសារចំនួនហាងលក់យានយន្តនៅទូទាំងប្រទេស ដែលមកដាក់ពាក្យស្នើសុំសិទ្ធិក្នុងការចុះបញ្ជីយានយន្ត នៅមានចំនួនតិច។ ម្យ៉ាងវិញទៀត ក្រសួងចង់ផ្តល់ឱកាសដល់ហាងលក់យានយន្ត ដែលមិនទាន់បានដាក់ពាក្យស្នើសុំ ឲ្យត្រៀមលក្ខណៈក្នុងការចូលរួមផ្តល់សេវាចុះបញ្ជីនេះ ឲ្យបានទូលំទូលាយនៅទូទាំងប្រទេស។
ក្រសួងសាធារណការ និងដឹកជញ្ជូន ក៏បានជម្រាបជូនប្រជាពលរដ្ឋ ដែលជាម្ចាស់រថយន្ត អាចធ្វើការចុះបញ្ជីរថយន្ត ដោយខ្លួនឯងផ្ទាល់ តាមរយៈ អាសយដ្ឋាន៖ https:// vechicle.mpwt.gov.kh របស់ក្រសួងសាធារណការ និងដឹកជញ្ជូន រួចយកឯកសារច្បាប់ដើម ទៅតម្កល់នៅទីតាំងផ្តល់សេវាសាធារណៈរបស់ក្រសួងសាធារណការ និងដឹកជញ្ជូន ដើម្បីទទួលបានស្លាកលេខ និងប័ណ្ណសម្គាល់របស់រថយន្ត៕
