ភ្នំពេញ ៖ លោកស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានក្រើនរំលឹក ក៏ដូចជាដាស់តឿនដល់មន្រ្តីក្រោមឱវាទ ត្រូវខិតខំធ្វើការងារ ជូនក្រសួង ឲ្យបានល្អ ដើម្បីធ្វើឲ្យប្រទេសជាតិ កាន់តែមានការរីកចម្រើនទៅមុខ ។ ក្នុងឱអញ្ជើញសំណេះសំណាល ជាមួយមន្ដ្រីឆ្នើមក្រសួង ប្រចាំខែឧសភា និងខែមិថុនា ដោយមានការចូលរួមពីថ្នាក់ដឹកនាំក្រសួង និងមន្ត្រីឆ្នើម មកពីអង្គភាពក្រោម ឱវាទក្រសួងប្រមាណ៦៤រូប នៅថ្ងៃទី១ ខែកក្កដា ឆ្នាំ២០១៩លោក ស៊ុន ចាន់ថុល បានថ្លែងថា ការងារសាងសង់ ក្រសួងសាធារណការ និងដឹកជញ្ជូន មានតួនាទីផ្ដល់ សេវាសាធារណៈជូនប្រជាពលរដ្ឋ ឱ្យបានលឿន មានប្រសិទ្ធភាព និងតម្លាភាព ធ្វើយ៉ាងណា បង្ខិតសេវាសាធារណៈឱ្យជិតប្រជាពលរដ្ឋ តាមរយៈការចុះបញ្ជីយានយន្ត ការប្រឡងយកបណ្ណបើកបរ និងការត្រួតពិនិត្យលក្ខណៈបច្ចេកទេសយានយន្ត តាមប្រព័ន្ធអនឡាញ និងកម្មវិធីថែទាំផ្លូវ ROAD CARE Mobile App ជាដើម ។ លោកបន្តថា “មន្ដ្រីរាជការត្រូវខិតខំយកចិត្តទុកដាក់ បំពេញការងារជូនក្រសួង និងប្រទេសជាតិ ដើម្បីភាពរីកចម្រើន និងការអភិវឌ្ឍ “។ ក្នុងឱកាសនោះលោករដ្ឋមន្រ្តីប្រកាសបង្កើតគម្រោង ជ្រើសរើសមន្ទីរឆ្នើមប្រចាំឆ្នាំ ដើម្បីជំរុញលើក ទឹកចិត្ត ឱ្យមន្ទីរសាធារណការ និងដឹកជញ្ជូន ទូទាំងរាជធានី-ខេត្តទាំងអស់ ខិតខំប្រឹងប្រែងបំពេញការងារ ឱ្យកាន់តែមានប្រសិទ្ធភាព ក្នុងការសាងសង់ ជួសជុលថែទាំផ្លូវថ្នល់។ លោកបានណែនាំឲ្យមន្ត្រីទាំងអស់ ត្រូវអនុវត្តអនុសាសន៍ទាំង១១ចំណុច របស់សម្ដេចតេជោនាយករដ្ឋមន្ត្រីកម្ពុជា ឱ្យបានខ្ជាប់ខ្ជួន រួបរួមសាមគ្គី សហការគ្នាថែមទៀត ក្នុងការបម្រើប្រជារាស្ត្រ ឱ្យបានកាន់តែល្អប្រសើរ ឡើងមួយកម្រិតទៀត៕