ភ្នំពេញ៖ នាយឧត្តមសេនីយ៍ ហ៊ឹម យ៉ាន អគ្គស្នងការរងនៃ អគ្គស្នងការនគរបាលជាតិ បានឆ្លើយតបទៅសមាគម រោងចក្រកាត់ដេរនៅកម្ពុជា (GMAC) ថា ការដឹកជញ្ជូនទំនិញមានភាពយឺតយ៉ាវ មិនមែនដោយសារការរឹតបន្ដឹង ច្បាប់ចរាចរណ៍ផ្លូវគោកនោះទេ តែមកពីអ្នកបើកបរឲ្យ ក្រុមហ៊ុនដឹកជញ្ជូនមួយចំនួន មិនគោរពច្បាប់ចរាចរណ៍ និងមិនសហការជាមួយ អាជ្ញាធរមានសមត្ថកិច្ច។ នាពេលថ្មីៗនេះ GMAC ស្នើសុំរាជរដ្ឋាភិបាលឲ្យមាន ដំណោះស្រាយបណ្តោះអាសន្ន ជាមួយសមាគមអ្នកដឹកជញ្ជូនកម្ពុជា (CAMTA) ពាក់ព័ន្ធនិងការពង្រឹងការអនុវត្តច្បាប់ ចរាចរណ៍របស់គណៈកម្មការជាតិ សុវត្ថិភាពចារាចរណ៍ផ្លូវគោក ពីព្រោះសមាជិករបស់ GMAC បាននិងកំពុងក្លាយទៅជាជនរងគ្រោះ ក្នុងបញ្ហានេះដោយមិនដឹងខ្លួន។ វត្ថុធាតុដើមនាំចូល និងផលិតផលសម្រេចនាំ ចេញជាច្រើនរបស់សមាជិក GMAC ត្រូវបានកកស្ទះដែលនឹងអាច បង្កឲ្យមានការខាតបង់ផ្នែកហិរញ្ញវត្ថុ ក៏ដូចជាទំនុកចិត្ត ពីសំណាក់អ្នកបញ្ជាទិញលើភាព អាចទុកចិត្តបានស្តីពីប្រសិទ្ធភាព នៃការផ្គត់ផ្គង់ទំនិញបានទាន់ពេលវេលា។ ក្នុងសន្និសីទសារព័ត៌មាន ស្តីពីស្ថានភាពនៃការអនុវត្តយន្ត ការចុះត្រួតពិនិត្យលក្ខណៈ បច្ចេកទេសយានយន្ត និងបណ្ណបើកបររបស់ អ្នកបើកបររថយន្តដឹកទំនិញចេញ-ចូល កំពង់ផែព្រះសីហនុ និងកំពង់ផែភ្នំពេញ នៅថ្ងៃទី២ ខែកក្កដា ឆ្នាំ២០១៩ លោក ហ៊ឹម យ៉ាន មានប្រសាសន៍ថា “កិច្ចការនេះ (ការដឹកជញ្ជូនទំនិញយឺតយ៉ាវ) មិនមែនយឺតយាវ ដោយសារតែការឹតបន្ដឹងច្បាប់នេះទេ ។ យឺតយ៉ាវដោយសារតែ ក្រុមហ៊ុនដឹកជញ្ជូនទំនិញ ម្ចាស់យានយន្ដហ្នឹង គឺថាមិនគោរពច្បាប់ចរាចរណ៍ មិនមែនមកពីសមត្ថកិច្ចទេ ឡានដែលគោរពពិនិត្យតែ២នាទី ត្រូវឆ្លងផុតពីការត្រួតពិនិត្យហើយ”។ លោកបានសំណូមពរដល់ ក្រុមហ៊ុនដឹកជញ្ជូនទំនិញ ទាំងអស់គោរពច្បាប់ចរាចរណ៍ ធានាលក្ខណៈបច្ចេកទេស យានយន្តឲ្យបានត្រឹមត្រូវ តាមច្បាប់កំណត់ និងមានឯកសារគ្រប់គ្រាន់ ត្រឹមត្រូវតាមច្បាប់កំណត់។ បន្ថែមពីនេះ GMAC អំពាវនាវឲ្យក្រុមហ៊ុនផ្តល់សេវា ដឹកជញ្ជូនទំនិញធុនធ្ងន់ទាំងអស់ ព្យាយាមគោរពច្បាប់ស្តីពីចរាចរណ៍ ផ្លូវគោកឲ្យបានពេញលេញ ដើម្បីធានាសុវត្ថិភាព លើផ្លូវសាធារណៈ និងធានាបាននូវនិរន្តរភាព នៃការផ្តល់សេវាឯកជនដល់ អតិថិជនរបស់ខ្លួន។ សូមរំលឹកថា ក្នុងប្រតិបត្តិការចុះត្រួតពិនិត្យ លក្ខណៈបច្ចេកទេសយានយន្ត និងប័ណ្ណបើកបរ នៅកំពង់ផែភ្នំពេញ និងកំពង់ផែព្រះសីហនុ ក្នុងរយៈពេល១៥ថ្ងៃ ក្រុមការងារត្រួតពិនិត្យរឹតបន្តឹង ការអនុវត្តច្បាប់ចរាចរណ៍ បានចុះត្រួតពិនិត្យរថយន្ដធុនធំ១៩៥៩គ្រឿង នៅចំណុចកំពង់ផែស្វយ័តភ្នំពេញ និងកំពង់ផែស្វយ័តព្រះសីហនុ ក្នុងនោះរកឃើញរថយន្ដខុស បច្ចេកទេសចំនួន ២២៤គ្រឿង ៕ ដោយ៖ អេង ប៊ូឆេង