[Raksmey News] - សម្តេចតេជោហ៊ុនសែននឹងចូលរួមក្នុងវេទិកាខ្សែក្រវ៉ាត់និងផ្លូវលើកទី២នៅទីក្រុងប៉េកាំង
2019-04-22
ទៅកាន់ទំព័រចុះផ្សាយក្នុង Raksmey News
ដោយៈមុនីរ័ត្ន/ភ្នំពេញៈតបតាមការអញ្ជើញរបស់លោកស៊ីជីនពីងប្រធានាធិបតីនៃសាធារណរដ្ឋប្រជាមានិតចិន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញចូលរួមក្នុង«វេទិកាខ្សែក្រវ៉ាត់និងផ្លូវលើកទី២សម្រាប់កិច្ចសហប្រតិបត្តិការអន្តរជាតិ»។
ក្នុងនោះកិច្ចប្រជុំសំខាន់ៗផ្សេងទៀតដែលនឹងប្រព្រឹត្តទៅពីថ្ងៃទី២៥ដល់ថ្ងៃទី២៩ខែមេសាឆ្នាំ២០១៩នៅទីក្រុងប៉េកាំង។នេះបើយោងតាមសេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិនៅថ្ងៃទី២២ ខែមេសា ឆ្នាំ២០១៩នេះ។
មន្ត្រីក្រសួងការបរទេសនិងសហប្រតិបត្តិការអន្តរជាតិបានបន្តថាឥស្សរជនអញ្ជើញអមដំណើរសម្តេចតេជោនាយករដ្ឋមន្ត្រី រួមមាន លោកឧបនាយករដ្ឋមន្ដ្រីហោ ណាំហុង លោកឧបនាយករដ្ឋមន្ដ្រី ប្រាក់ សុខុនរដ្ឋមន្ត្រីការបរទេសនិងសហប្រតិបត្តិការអន្តរជាតិ។
លោកឧបនាយករដ្ឋមន្ដ្រីអូនព័ន្ធមុនីរ័ត្នរដ្ឋមន្ត្រីសេដ្ឋកិច្ច និងហិរញ្ញវត្ថុ ។លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីសាធារណការ និងដឹកជញ្ជូន លោកវេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទ ។លោក ប៉ាន សូរស័ក្តិ រដ្ឋមន្ត្រីពាណិជ្ជកម្ម លោកម៉មប៊ុនហេងរដ្ឋមន្ត្រីសុខាភិបាល។លោកថោងខុនរដ្ឋមន្ត្រីទេសចរណ៍សមាជិកជាន់ខ្ពស់នៃរាជរដ្ឋាភិបាលកម្ពុជាផ្សេងទៀត និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជា។
មន្ត្រីដដែលបានបញ្ជាក់ថា នៅក្នុងសម័យប្រជុំជាន់ខ្ពស់នៃវេទិកាខ្សែក្រវ៉ាត់ និងផ្លូវលើកទី២ នៅថ្ងៃទី ២៦ ខែមេសាសម្តេចតេជោនាយករដ្ឋមន្ត្រីនឹងថ្លែងសុន្ទរកថាពីមូលបទរបស់វេទិកា«កិច្ចសហប្រតិបត្តិការខ្សែក្រវ៉ាត់និងផ្លូវៈបង្កើតជោគវាសនារួមដ៏ត្រចះត្រចង់»។
នៅថ្ងៃបន្ទាប់នៅក្នុងសម័យប្រជុំតុមូលរបស់ថ្នាក់ដឹកនាំ សម្តេចតេជោនាយករដ្ឋមន្ត្រីនឹងអញ្ជើញចែករំលែកទស្សនវិស័យលើមូលបទ«ការជម្រុញការតភ្ជាប់ ដើម្បីស្វែងរកធនធានថ្មីសម្រាប់ការរីកចម្រើន»។
បន្ទាប់ពីអញ្ជើញចូលរួមវេទិកាខ្សែក្រវ៉ាត់និងផ្លូវលើកទី២សម្តេចតេជោនាយករដ្ឋមន្ត្រីនិងប្រមុខរដ្ឋ/រដ្ឋាភិបាលផ្សេងទៀតនឹងអញ្ជើញចូលរួមពិធីបើកពិព័រណ៍សាកវប្បកម្មអន្តរជាតិ២០១៩ដែលនៅក្នុងឱកាសនោះសម្តេចតេជោនាយករដ្ឋមន្ត្រីនឹងសម្ពោធពន្លាជាតិរបស់កម្ពុជា។
ក្នុងអំឡុងពេលស្នាក់នៅប្រទេសចិន សម្តេចតេជោនាយករដ្ឋមន្ត្រី នឹងមានជំនួបទ្វេភាគីដាច់ដោយឡែកពីគ្នា ជាមួយលោកប្រធានាធិបតី ស៊ី ជីនពីង លោកនាយករដ្ឋមន្ត្រី លី ខឺឈាង ឯកឧត្តម វ៉ាង ហ៊ុននីង សមាជិកការិយាល័យនយោបាយ និងជាលេខានៃលេខាធិការដ្ឋានបក្សកុម្មុយនីស្តចិន។
សម្តេចតេជោនាយករដ្ឋមន្ត្រីក៏នឹងជួបជាមួយលោកលីយ៉ុងអគ្គនាយកអង្គការឧស្សាហកម្មអង្គការសហប្រជាជាតិ ព្រមទាំងទទួលការចូលជួបសម្តែងការគួរសមពីតំណាងក្រុមហ៊ុនចិនមួយចំនួន។ក្នុងអំឡុងពេលនៃដំណើរទស្សនកិច្ចនេះមានការរំពឹងថានឹងមានការចុះហត្ថលេខាលើឯកសារមួយចំនួនស្តីពីជំនួយរបស់ចិន ព្រមទាំងគម្រោងកិច្ចសហប្រតិបត្តិការនានា ផងដែរ។
លើសពីនេះទៅទៀតសម្តេចតេជោនាយករដ្ឋមន្ត្រីនឹងថ្លែងសុន្ទរកថាសំខាន់មួយនៅក្នុងពិធីជួបជាមួយនិស្សិតនិងសាស្ត្រាចារ្យនៅសកលវិទ្យាល័យប៉េកាំងក្នុងឱកាសដ៏ឧត្តុងឧត្តមដែលសម្តេចតេជោនាយករដ្ឋមន្ត្រីទទួលបាននូវការប្រគល់គោរមងារជាសាស្ត្រាចារ្យកិត្តិយសផ្នែកទំនាក់ទំនងអន្តរជាតិ ៕S/
