ព្រះសីហនុ ថ្ងៃទី២៦ ខែកុម្ភៈ ឆ្នាំ២០១៩ -លោក ជាវ វិជ្ជាក់ អភិបាលរងខេត្តព្រះសីហនុ និងជាប្រធានក្រុមការងារបច្ចេកទេស អូរ ប្រឡាយ បានដឹកនាំក្រុមការងារមន្ទីរសាធារណការ និងដឹកជញ្ជូន មន្ទីរបរិស្ថាន មន្ទីរធនធានទឹក ស្តារប្រឡាយមួយខ្សែនៅមុខសាលាខេត្តព្រះសីហនុ ស្ថិតក្នុងសង្កាត់លេខ៣ ក្រុង ខេត្តព្រះសីហនុ នារសៀលថ្ងៃចន្ទ ៦រោច ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ខែកុម្ភៈ ឆ្នាំ២០១៩ ។លោកអភិបាលរងខេត្តបានបញ្ជាក់ថា ការស្តារប្រឡាយនាពេលនេះ ដើម្បីរក្សា បឹងប្រមូលទឹកកខ្វក់ចូលអាង មុននឹងបង្ហូរចូលក្នុងសមុទ្រ អាងដែលត្រូវស្តារឡើងវិញនេះមានប្រវែង ១០០ម៉ែត្រ និងទទឹង ១៥ម៉ែត្រ ចែកជាពីរ ក្នុងការជួយសម្រួល និងធ្វើការបំប្លែងទឹកកខ្វក់មុននឹងហូរចូលសមុទ្រ ។លោកអភិបាលរងខេត្តបានបន្តថា ដើម្បីប្រមូលទឹកកខ្វក់ដែលនៅជុំវិញតំបន់នេះ ចាប់ពី តំបន់កាំសាប រហូតដល់អូរអីម៉ារីយូ ដើម្បីធ្វើយ៉ាងណាកុំឱ្យទឹកកខ្វក់ហូរចូលទៅសមុទ្រ ក្រុមការងារអូរ ប្រឡាយ បានស្តារអូរមួយនេះធ្វើការបំប្លែងទឹកកខ្វក់ ។ តាមមន្ត្រីជំនាញរបស់មន្ទីរសាធារណការ បានផ្តល់នូវបច្ចេកទេស ដោយលើកដីទប់ជាទំនប់ទប់ទឹកកខ្វក់នេះ រួចយើងដាក់ជី EM ដើម្បីបំប្លែងទឹកកខ្វក់ កាត់បន្ថយក្លិនស្អុយ ដើម្បីរក្សាគុណភាពទឹកសមុទ្រឱ្យមានលក្ខណៈល្អប្រសើរឡើងវិញមុននឹងបង្ហូរចូលទៅសមុទ្រ ដោយសារតែអូរមួយនេះ ជាអាងស្តុកទឹកកខ្វក់មួយយ៉ាងសំខាន់ក្នុងតំបន់ឆ្នេរជ័យជម្នះ ដើម្បីកាត់បន្ថយក្លិនស្អុយ និង ផលប៉ះពាល់បរិស្ថានតំបន់ឆ្នេរ ។ នៅពេលអនាគតអូរមួយនេះ នឹងរៀបចំឱ្យទៅជាស្ថានីយបូមទឹកកខ្វក់បន្តទៅស្ថានីយទី១ នៅអូរឈើទាល ដោយសារបច្ចុប្បន្នក្រុងព្រះសីហនុមានអាងស្តុកទឹកកខ្វក់១កន្លែងមានទំហំដីជាង១៦ហិកតា ស្ថិតនៅចុងដីអារីស្តុនក្នុងសង្កាត់លេខ៤ ក្រុងព្រះសីហនុ ។លោកបានបន្តថា កន្លងមកក្រុមការងារបច្ចេកទេសបានរៀបចំប្រើប្រាស់ ជី EM នៅអាងចម្រោះក្បែរសណ្ឋាគារសុខា ក្នុងសង្កាត់លេខ៣ ការប្រើប្រាស់ជី EM វាមានដំណាក់កាលរបស់វា កាលណាវាអស់គុណភាព យើងនឹងដាក់សារធាតុជី EM បន្តទៀតដើម្បីបំប្លែងទឹក មុននឹងបង្ហូរចូលទៅសមុទ្រ ។ លោកបានបញ្ជាក់ថា ដោយមានការយកចិត្តទុកដាក់របស់រាជរដ្ឋាភិបាល ស្តីពីប្រព័ន្ធអូរ ប្រឡាយ ក្នុងក្រុងព្រះសីហនុ ដែលមានក្រសួង ៧បានចូលរួម ពិសេសឯកឧត្តម ជា សុផារ៉ា ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ រដ្ឋមន្រ្តីក្រសួងបរិស្ថាន និងរដ្ឋមន្ត្រីក្រសួងទេសចរណ៍ បានរៀ ចំសាងសង់នូវអាងប្រព្រឹត្តិកម្មចំនួន ៤ ទីតាំង ក្នុងក្រុងព្រះសីហនុ អាងទាំង៤នេះ នឹងគ្រោងបញ្ចប់ការដ្ឋានមុនចូលឆ្នាំថ្មីប្រពៃណីខ្មែរខាងមុខនេះ។ បច្ចុប្បន្នស្ថានីយទាំង ៤ សាងសង់បានប្រមាណជា ៩០ភាគរយ នឹងត្រូវបំពាក់នូវម៉ាស៊ីនបូមទឹក ដើម្បីបូមចេញពីអាងទៅអាងចម្រោះនៅចុងដីអារីស្តុន ហើយបញ្ហាទឹកកខ្វក់នៅតាមអូរ ប្រឡាយសំខាន់ៗក្នុងក្រុងព្រះសីហនុនឹងអស់កង្វល់ហើយនៅពេលខាងមុខ ។ លោកអភិបាលរងខេត្តបានបន្តថា ចំពោះការងារស្តារអូរ ប្រឡាយ មានបញ្ហាប្រឈមមួយចំនួនដោយសារតែយើងខ្វះនូវធនធានមនុស្ស ហើយទំហំការងាររបស់យើងមានទំហំធំ ទើបមានការយកចិត្តទុកដាក់ពីថ្នាក់ជាតិ ចុះមកជួយដោះស្រាយបញ្ហាទឹកកខ្វក់នៅក្រុងព្រះសីហនុ ដើម្បីទប់ស្កាត់ទឹកកខ្វក់ និងកែលម្អបរិស្ថានតំបន់ឆ្នេរឱ្យមានភាពស្រស់ស្អាតឡើងវិញ ដើម្បីទាក់ទាញភ្ញៀវទេសចរជាតិ អន្តរជាតិមកលេងកម្សាន្តនៅខេត្តព្រះសីហនុ ៕