[Property Area] - លោកស៊ុន ចាន់ថុល លើកឡើងពីហេដ្ឋារចនាសម្ព័ន្ឋធំៗចំនួន១០ដែលបាន និងគ្រោងសាងសង់
2019-02-09
ទៅកាន់ទំព័រចុះផ្សាយក្នុង Property Area
ភ្នំពេញ៖ ទេសរដ្ឋមន្រ្តី រដ្ឋមន្រ្តីក្រសួងសាធារណៈការ និងដឹកជញ្ជូនលោកស៊ុន ចាន់ថុលបានលើកឡើងពីគំរោងហេដ្ឋារចនាសម្ព័ន្ឋធំៗ ដែលរដ្ឋាភិបាលបានសាងសង់ និងត្រៀមសាងសង់នាពេលខាងមុខ។
លោកបានមានប្រសាសន៍ឲ្យដឹងក្នុងកិច្ចប្រជុំជាមួយដៃគូអភិវឌ្ឍន៍នានា និងក្រសួងពាក់ព័ន្ឋកាលពីថ្ងៃទី៧ កុម្ភៈកន្លងមកថា ក្រសួងបានសម្រេចសមិទ្ឋផលធំៗជាច្រើន ដូចជា ការដាក់ឱ្យប្រើប្រាស់ជាផ្លូវការ នូវមជ្ឈមណ្ឌលបណ្ដុះបណ្ដាលបើកបររថយន្តធុនធ្ងន់ យុទ្ធនាការជិះកង់មើលផ្លូវ គម្រោងពង្រីកនិងធ្វើឱ្យប្រសើរឡើងផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ ផ្លូវជាតិលេខ៦ ពីខេត្តសៀមរាបទៅប៉ោយប៉ែត ផ្លូវជាតិលេខ៧ ផ្លូវជាតិលេខ៤៨។
អ្វីកាន់តែពិសេសនោះ គឺរដ្ឋាភិបាលបានកសាងផ្លូវជាតិលេខ៥៥ពោធិ៍សាត់ទៅថ្មដា ផ្លូវក្រវាត់ក្រុងទី៣ និងគម្រោងផ្លូវពីបាត់ដំបង ទៅកោះកុងប្រវែង១៩៧គីឡូម៉ែត្រ ដែលគ្រោងបើកការដ្ឋាននៅឆ្នាំនេះ។
លោកស៊ុន ចាន់ថុលបានបញ្ជាក់បន្តថា “ការអភិវឌ្ឍហេដ្ឋារចនាសម្ព័ន្ធនៅកម្ពុជាឱ្យមានការរីកចម្រើន ដើម្បីកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាជនកម្ពុជា”។
សម្តេចតេជោហ៊ុន សែននាយករដ្ឋមន្រ្តីកម្ពុជាកាលពីពេលថ្មីៗនេះ ក៏បានលើកពីគំរោងសាងសង់ផ្លូវចេញពីសំឡូត ខេត្តបាត់ដំបង ឆ្លងកាត់ខេត្តពោធិសាត់ទៅកាន់ខេត្តកោះកុងផងដែរ ពិសេសសម្តេចបានលើកឡើងពីគំរោង ខ្ចីឥណទានពីរដ្ឋាភិបាលចិន ដើម្បីសាងសង់ស្ពាននៅតំបន់ថ្មបាំង ដើម្បីតភ្ជាប់ផ្លូវនេះផងដែរ។
សម្តេចតេជោបានគូសបញ្ជាក់ថា “សូមបងប្អូនប្រជាពលរដ្ឋរង់ចាំផ្លូវនេះ ដែលរដ្ឋាភិបាលនឹងសាងសង់នាពេលខាងមុខនេះ”។
អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រសាសន៍ថា ការសាងសង់ផ្លូវនេះមិនត្រឹមតែធ្វើឡើង ដើម្បីធ្វើសមាហរណកម្មផ្ទៃក្នុងកម្ពុជានោះទេ តែក៏ដើម្បីកាត់បន្ថយការពឹងផ្អែកលំហូរទំនិញទៅកាន់ប្រទេសជិតខាង តាមរយៈការដឹកជញ្ជូនកសិផលនានាចេញពីខេត្តភូមិភាគពាយ័ព្យនានា ឆ្ពោះទៅកាន់កំពង់ផែក្នុងខេត្តកោះកុង មុននាំចេញទៅកាន់បរទេស។
លោកបន្តថា “រដ្ឋាភិបាលត្រូវចំណាយទុនរាប់ពាន់លានដុល្លារអាមេរិក ដើម្បីអភិវ ឌ្ឍន៍ហេដ្ឋារចនាសម្ព័ន្ឋនានា ព្រោះដើម្បីពន្លឿនកំនើនសេដ្ឋកិច្ច កម្ពុជាត្រូវតែវិនិយោគលើហេដ្ឋារចនាសម្ព័ន្ឋ”។លោកបន្តថា “វាឈានដល់ដំណាក់កាលថ្មីនៃសេដ្ឋកិច្ច ដែលត្រូវតែវិនិយោគលើហេដ្ឋារចនាសម្ព័ន្ឋហើយ”៕
