[RFA Khmer] - នាគារអភិវឌ្ឍន៍អាស៊ីផ្ដល់ប្រាក់កម្ចី៧០លានដុល្លារដល់កម្ពុជាលើវិស័យគមនាគមន៍
2017-10-03
ទៅកាន់ទំព័រចុះផ្សាយក្នុង RFA Khmer
ក្រុមប្រឹក្សាភិបាលធនាគារអភិវឌ្ឍន៍អាស៊ី (ADB) បានយល់ព្រមផ្ដល់ប្រាក់កម្ចីចំនួន ៧០លានដុល្លារ ដើម្បីជួយធ្វើឲ្យវិស័យគមនាគមន៍កម្ពុជាកាន់តែមានគុណភាព ប្រសិទ្ធភាព និងគុណភាព។
ប្រាក់កម្ចីនេះ ដើម្បីកែលំអផ្លូវជាតិក្នុងខែត្រព្រៃវែង សៀមរាប និងខែត្រស្វាយរៀង ដែលជាខែត្រស្ថិតនៅតាមបណ្ដោយច្រករបៀងសេដ្ឋកិច្ចភាគខាងត្បូងនៃមហាអនុតំបន់ទន្លេមេគង្គ។
អ្នកឯកទេសជាន់ខ្ពស់ផ្នែកគមនាគមន៍នៃធនាគារអភិវឌ្ឍន៍អាស៊ី អ្នកស្រី អូយុនឆីមេច អ័រដែន (Oyunchimeg Erdene) មានប្រសាសន៍នៅក្នុងសេចក្ដីប្រកាសព័ត៌មានថ្ងៃទី២ តុលា ថា នៅកម្ពុជា ផ្លូវថ្នល់គឺជាប្រភេទគមនាគមន៍ចម្បងជាងគេ ដែលធ្វើឲ្យការដឹកជញ្ជូនថ្នល់មានសារៈសំខាន់ ដល់ការអភិវឌ្ឍន៍សង្គម និងសេដ្ឋ។ ក៏ប៉ុន្តែ អនុវិស័យផ្លូវថ្នល់នៅក្នុងប្រទេសកម្ពុជា នៅតែមិនមានប្រសិទ្ធិភាព និងនៅមានលក្ខណៈបែកខ្ញែកនៅឡើយ។ ក្រៅពីកែលំអផ្លូវថ្នល់ដែលមានស្រាប់នៅក្នុងខែត្រគោលដៅទាំងបី គម្រោងនេះក៏នឹងជួយបង្កើនសមត្ថភាពរបស់រដ្ឋាភិបាលក្នុងការគ្រប់គ្រងទ្រព្យសម្បត្តិផ្លូវថ្នល់។
គម្រោងកែលំអបណ្ដាញផ្លូវថ្នល់នេះ នឹងកែលំអកំណាត់ផ្លូវជាតិ ១៤៧គីឡូម៉ែត្រ ដែលជាកំណាត់ផ្លូវគ្មានសុវត្ថិភាព និងងាយលិចលង់ដោយសារទឹកជំនន់ នឹងអាចតភ្ជាប់ទំនាក់ទំនងគ្រប់រដូវកាល និងធននឹងអាកាសធាតុ។ គម្រោងនេះនឹងបង្កើនសមត្ថភាពរដ្ឋាភិបាល ដែលមានក្រសួងសាធារណការជាសេនាធិការក្នុងការគ្រប់គ្រងសម្បត្តិផ្លូវថ្នល់របស់ខ្លួនឲ្យកាន់តែប្រសើរ។
រដ្ឋាភិបាលកម្ពុជាបានដឹកនាំប្រទេស ពឹងផ្អែកខ្លាំងទៅលើកម្ចី និងជំនួយពីបរទេស។ ក្រសួងសេដ្ឋកិច្ចកម្ពុជា បញ្ជាក់ថា រដ្ឋាភិបាលកម្ពុជា គិតត្រឹមដំណាច់ឆ្នាំ២០១៥ ជំពាក់បំណុលបរទេសចំនួន ៥,៦ពាន់លានដុល្លារសហរដ្ឋអាមេរិក។ រយៈពេលដូចគ្នានេះ វិស័យឯកជនបានខ្ចីប្រាក់ពីបរទេសចំនួនជិត ៤ពាន់លានដុល្លារ។ ជាសរុប ប្រទេសកម្ពុជា ជំពាក់បំណុលបរទេសជិត ១០ពាន់លានដុល្លារ។
កាលពីខែកុម្ភៈ ឆ្នាំ២០១៦ ធនាគារពិភពលោកបានព្យាករថា បំណុលក្រៅប្រទេសសាធារណៈរបស់រដ្ឋាភិបាលកម្ពុជា នឹងអាចកើនឡើងដល់ជាង ៦,៤ពាន់លានដុល្លារអាមេរិក។
បំណុលចិន ប្រមាណ ៤៥ភាគរយ នៃបំណុលបរទេសសរុបកម្ពុជា ជំពាក់ ដែលរដ្ឋាភិបាលអះអាងថា ប្រាក់កម្ចីនេះ ចូលរួមចំណែកយ៉ាងច្រើនក្នុងការអភិវឌ្ឍវិស័យហេដ្ឋារចនាសម្ព័ន្ធ និងសេដ្ឋកិច្ចកម្ពុជា៕
