មន្ត្រីក្របខណ្ឌថ្មីឆ្នាំ២០១៨ ចំនួន៥០រូប បានបញ្ចប់វគ្គបណ្តុះបណ្តាលបឋម និងទទួលបានវិញ្ញាបនបត្រ បញ្ជាក់ការសិក្សា ត្រៀមខ្លួនរួមចំណែកដល់ការអភិវឌ្ឍវិស័យហេដ្ឋារចនាសម្ព័ន្ធកម្ពុជាឱ្យមានការរីកចម្រើន --- នៅថ្ងៃពុធ ៣រោជ ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៣ ខែមករា ឆ្នាំ២០១៩ នៅទីស្តីការក្រសួងសាធារណការ និងដឹកជញ្ជូនមានប្រារព្ធពិធីបិទវគ្គបណ្តុះ បណ្តាលនិងប្រគល់វិញ្ញាបនបត្របញ្ជាក់ការសិក្សាជូនមន្ត្រីក្របខណ្ឌថ្មីឆ្នាំ២០១៨ ដែលទើបប្រឡងជាប់ ក្រោមអធិបតីភាពឯកឧត្តម តូច ចាន់កុសល រដ្ឋមន្ត្រីស្ដីទី។ ពិធីបិទវគ្គនេះ មានការអញ្ចើញចូលរួមពីថ្នាក់ដឹកនាំក្រសួង គ្រូឧទ្ទេសន៍ដែលជាមន្ត្រីរាជការក្រសួង ព្រមទាំងមន្ត្រីក្របខណ្ឌថ្មីចំនួន៥០រូបដែលនឹងត្រូវបំពេញការងារនៅទីស្តីការក្រសួង និងបណ្តាមន្ទីរសាធារណការ និងដឹកជញ្ជូននៅទូទាំង២៥រាជធានី-ខេត្ត។ ឯកឧត្តមរដ្ឋមន្ត្រីស្ដីទី បានជំរុញឲ្យមន្ត្រីក្របខណ្ឌថ្មីទាំងនេះ ខិតខំប្រឹងប្រែងបំពេញការងារដើម្បីប្រជាពលរដ្ឋក្នុងនាមជាមន្ត្រីរាជការ និងរួមចំណែកដល់ការអភិវឌ្ឍវិស័យហេដ្ឋារចនាសម្ព័ន្ធកម្ពុជាឱ្យមានការរីកចម្រើន។ ឆ្លៀតក្នុងឱកាសនេះ ឯកឧត្តមរដ្ឋមន្ត្រីស្ដីទី ក៏បានណែនាំផងដែរឲ្យមន្ត្រីក្របខណ្ឌថ្មីទាំងអស់ខិតខំស្វែងយល់បន្ថែមនូវច្បាប់សហលក្ខន្តិកៈមន្ត្រីរាជការនៃព្រះរាជាណាចក្រកម្ពុជា ដើម្បីអាចបំពេញតួនាទីជាអ្នកបម្រើសេវាជូនប្រជាពលរដ្ឋប្រកបដោយប្រសិទ្ធភាពនិងក្រមសីលធម៌ខ្ពស់ ហើយរាល់សកម្មភាព និងឥរិយាបទរបស់ខ្លួនត្រូវស្ថិតក្រោមបទបញ្ជា វិន័យ គោរពតាមឋានានុក្រម ធ្វើខ្លួនជាមន្ត្រីល្អ និងមានភាពស្មោះត្រង់ចំពោះអង្គភាព និងប្រទេសជាតិផងដែរ។ សួមជម្រាបជូនថាមន្ត្រីក្របខណ្ឌថ្មីទាំងនេះ នឹងចាប់ផ្តើមចូលបម្រើការងាររបស់ខ្លួនចាប់ពីថ្ងៃទី២៨ ខែមករា ឆ្នាំ២០១៩ តទៅ។