ជំនួបពិភាក្សាការងារជាមួយអ្នកជំនាញមកពីក្រុមហ៊ុន Global Advanced Solutions (G.A.S.G (Cambodia) Co.,Ltd) --- ថ្ងៃអង្គារ ១០កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៥ ខែមករា ឆ្នាំ២០១៩ ឯកឧត្ដម សូរ វ៉ិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ឯកឧត្ដមទេសរដ្ឋមន្ត្រី ស៊ុន ចាន់ថុល បានទទួលជួបពិភាក្សាការងារជាមួយអ្នកជំនាញមកពីក្រុមហ៊ុន Global Advanced Solutions (G.A.S.G (Cambodia) Co.,Ltd) ទាក់ទងនឹងការដឹកជញ្ជូនវ័យឆ្លាតនៅកម្ពុជា ដោយមានការចូលរួមពីថ្នាក់ដឹកនាំក្រសួង និងតំណាងក្រុមហ៊ុនផងដែរ។ ក្នុងជំនួបពិភាក្សានេះ តំណាងក្រុមហ៊ុនបានបង្ហាញពីការប្រើប្រាស់បច្ចេកវិទ្យាព័ត៌មានវិទ្យាដូចជា៖ GPS និងសិនស័រ ដើម្បីគ្រប់គ្រងការដឹកជញ្ជូនតាមរថយន្តកុងតឺន័រ សំដៅកាត់បន្ថយការកកស្ទះចរាចរណ៍ និងការដឹកជញ្ជូនទៅដល់គោលដៅបានទាន់ពេលវេលាកំណត់។ ឯកឧត្ដមរដ្ឋលេខាធិការ បានសម្តែងនូវការគាំទ្រចំពោះការប្រើប្រាស់បច្ចេកវិទ្យាទំនើបនេះ និងបានជម្រាបជូនគណៈប្រតិភូក្រុមហ៊ុនថា៖ ក្រសួងនឹងសិក្សាលទ្ធភាព និងអត្ថប្រយោជន៍នៃកម្មវិធីនេះ ដើម្បីឱ្យការប្រើប្រាស់ទទួលបានលទ្ធផលខ្ពស់ និងមានការទទួលខុសត្រូវពីភាគីពាក់ព័ន្ធ។