ភ្នំពេញ ៖ ដើម្បីបំពេញតម្រូវការ នៃការដឹកជញ្ជូនតាមផ្លូវដែក រាជរដ្ឋាភិបាល បានទិញក្បាលរថភ្លើងថ្មី ពីប្រទេសម៉ិចស៊ីកូ ចំនួន៣គ្រឿង ដើម្បីជួយសម្រួលការធ្វើដំណើរ របស់ប្រជាពលរដ្ឋ ដែលនៅក្នុងក្បាលរថភ្លើងនីមួយៗ មានមុខងារសំខាន់ៗ ចំនួន ១១ចំណុច ។ រថភ្លើងថ្មី៣គ្រឿងនេះ ត្រូវបានដឹកមកដល់កំពង់ផែស្វយ័តព្រះសីហនុ កាលពីថ្ងៃទី៩ មករា ដែលទិញពីម៉ិចស៊ីកូដោយក្នុង១គ្រឿង មានតម្លៃជាង១លានដុល្លារ អាចផ្ទុកអ្នកដំណើរជាច្រើននាក់។ យោងតាម គេហទំព័រហ្វេសប៊ុកក្រសួងសាធារណការ និងដឹកជញ្ជូន នៅថ្ងៃទី១៥ ខែមករា ឆ្នាំ២០១៩ បានឲ្យដឹងថា ក្បាលរថភ្លើងថ្មីមានមុខងារសំខាន់ ចំនួន១១ចំណុច រួមមាន ៖ ទី១-ផ្ទុកមនុស្សបាន៥៦នាក់ , ទី២-មានម៉ាស៊ីនត្រជាក់ , ទី៣-កៅអីអង្គុយធំទូលាយ ,ទី៤-មានបំពាក់ប្រព័ន្ធ Wi-Fi ,ទី៥-ប្រព័ន្ធហ្វ្រាំងចាប់បានលឿនរហ័ស , ទី៦-បង្កើនល្បឿនបានលឿនដល់៨០-៩០គីឡូម៉ែត្រក្នុងមួយម៉ោង , ទី៧-មានទ្វារ និងជណ្តើរចុះដោយស្វ័យប្រវត្តិ , ទី៨-មានបំពាក់ប្រព័ន្ធគ្រប់គ្រងរំយោល មិនរលាក់ , ទី៩-ប្រតិបត្តិការអាចបញ្ជា បានទាំងសងខាង , ទី១០-មានទូរទស្សន៍១២គ្រឿង ក្នុងមួយទូរថភ្លើង និងទី១១-បង្គន់អនាម័យ៕