ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានជំរុញ និងលើកទឹកចិត្តដល់កីឡាករ កីឡាការិនីទាំងអស់ បន្តខិតខំប្រឹងប្រែងហ្វឹកហាត់ជំនាញវិជ្ជាជីវៈ ដើម្បីត្រៀមយកមេដាយជូនជាតិ ក្នុងព្រឹត្តិការណ៍ស៊ីហ្គេម ដែលកម្ពុជាគ្រោងធ្វើជាម្ចាស់ផ្ទះនៅ២០២៣ខាងមុខ។ការជំរុញនេះបានធ្វើឡើង ក្នុងឱកាសឯកឧត្តមអញ្ជើញជាអធិបតីក្នុងពិធីប្រកួតកីឡាហែលទឹកជ្រើសរើសជើងឯកដណ្តើមពានរង្វាន់សម្តេចតេជោ សែន លើកទី៤ ប្រចាំឆ្នាំ២០១៨ ដែលបានប្រព្រឹត្តទៅមណ្ឌលកីឡាហែលទឹកតេជោសែន ខេត្តកំពង់ចាម ពីថ្ងៃទី១ ដល់ថ្ងៃទី២ ខែធ្នូ កន្លងទៅនេះ ក្នុងគោលបំណងរំលឹកដល់ថ្ងៃទី២ ធ្នូ ១៩៧៨ ថ្ងៃបង្កើតរណសិរ្សសាមគ្គីសង្គ្រោះជាតិ ដែលបានរំដោះប្រជាជន និងមាតុភូមិកម្ពុជាពីរបបប្រល័យពូជសាសន៍ ប៉ុលពត ក៏ដូចជាថ្ងៃខួបនៃការសម្ពោធដាក់ឱ្យប្រើប្រាស់មណ្ឌលកីឡាហែលទឹកតេជោសែន ខេត្តកំពង់ចាម។ក្នុងព្រឹត្តិការណ៍ប្រកួតកីឡាហែលទឹកនេះ មានកីឡាករ-កីឡាការិនីចំនួន១២៥នាក់ ក្នុងនោះស្រី៥៧នាក់ មកពីក្លឹបចំនួន៨ បានចូលរួមប្រកួតប្រជែងលើវិញ្ញាសាឯកត្តជន វិញ្ញាសាហែលបណ្តាក់ និងវិញ្ញាសាកីឡាបាល់ទឹក ដោយមានការចូលរួមពីគ្រូបង្វឹកចំនួន១២នាក់ គរុសិស្ស និងសិស្សសាលា វិទ្យាល័យចំនួន៤០០នាក់ បានចូលរួមទស្សនាការប្រកួតនេះផងដែរ៕ អត្ថបទ៖ អ៊ី កនិកា ០៣.១២.២០១៨