កម្ពុជាត្រៀមអភិវឌ្ឍច្រកទ្វារព្រំដែនអន្តរជាតិទាំង ៤ ឱ្យក្លាយជា «ច្រកទ្វារឆ្លាតវៃ» តាមគម្រោង 3CEP [ភ្នំពេញ] — ដើម្បីពង្រឹងសមត្ថភាពដឹកជញ្ជូនឆ្លងកាត់ព្រំដែន រាជរដ្ឋាភិបាលតាមរយៈគម្រោង 3CEP កំពុងពន្លឿនការរៀបចំប្លង់វិស្វកម្ម ដើម្បីអភិវឌ្ឍច្រកទ្វារព្រំដែនចំនួន ៤ ឱ្យក្លាយជា «ច្រកទ្វារឆ្លាតវៃ» (Smart Border Gate)។ នៅថ្ងៃទី១៦ ខែកក្កដា ឆ្នាំ២០២៦ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំអន្តរក្រសួង ដើម្បីប្រមូលធាតុចូលសម្រាប់សាងសង់ស្ថានីយ និងហេដ្ឋារចនាសម្ព័ន្ធនៅច្រកទ្វារភ្នំដិន ខេត្តតាកែវ, អូរយ៉ាដាវ ខេត្តរតនគិរី, ត្រពាំងស្រែ ខេត្តក្រចេះ និងត្រពាំងផ្លុង ខេត្តត្បូងឃ្មុំ ដោយប្រើប្រាស់ហិរញ្ញប្បទានពីធនាគារ AIIB។ តាមក្រសួងសាធារណការ ការអភិវឌ្ឍនេះនឹងបញ្ចូលបច្ចេកវិទ្យាឌីជីថលទំនើបៗ ដើម្បីសម្រួលការងារឱ្យកាន់តែរហ័ស និងមានប្រសិទ្ធភាព ដែលនឹងរួមចំណែកជំរុញទំហំពាណិជ្ជកម្មកម្ពុជា-វៀតណាម ឱ្យសម្រេចបានគោលដៅ ២០ពាន់លានដុល្លារអាម៉េរិក។ ក្រសួងបញ្ជាក់ថា គម្រោងនេះមិនត្រឹមតែជួយសម្រួលការដឹកជញ្ជូន និងទេសចរណ៍ប៉ុណ្ណោះទេ ប៉ុន្តែថែមទាំងជាផ្នែកមួយនៃការអនុវត្តយុទ្ធសាស្ត្របញ្ចកោណ និងផែនការមេអភិវឌ្ឍតំបន់ភូមិភាគឦសានរបស់រាជរដ្ឋាភិបាលកម្ពុជាផងដែរ៕