បន្ទាយមានជ័យ ៖ គិតត្រឹម​ដំណាច់ខែមិថុនា ឆ្នាំ ២០២៦ កំណាត់​ផ្លូវ​ចុងក្រោយ​​នៃផ្លូវជាតិលេខ​៥ ពីសិរីសោភ័ណ ប៉ោយ​ប៉ែត សម្រេច​បានវឌ្ឍនភាពសាងសង់​ប្រមាណ ៦៣%ហើយ ។​ នេះបើតាម​សេចក្ដីប្រកាសព័ត៌មានរបស់ក្រសួង​សាធារណការ​និងដឹកជញ្ជូននៅថ្ងៃទី ១០ កក្កដា ឆ្នាំ ២០២៦ ។​បើតាមរបាយការណ៍របស់​ក្រសួងសាធារណការ​និងដឹកជញ្ជូន បានឱ្យដឹងថា កំណាត់ចុងក្រោយ ផ្លូវជាតិលេខ៥ សិរីសោភ័ណ-ប៉ោយប៉ែត ខេត្តបន្ទាយមានជ័យ ប្រវែងសរុប ៣៥,១៤គីឡូម៉ែត្រ កំពុងពន្លឿនដំណើការ ដោយសម្រេចបានលទ្ធផលជារួម៦៣%ហើយ គិតត្រឹមដំណាច់ខែមិថុនា ឆ្នាំ២០២៦។ កំណាត់ផ្លូវជាតិលេខ៥(សិរីសោភ័ណ-ប៉ោយប៉ែត) គឺជាកំណាត់ចុងក្រោយ នៃគម្រោងស្តារ និងលើកកម្រិតគុណភាពផ្លូវជាតិលេខ៥ គ្រោងរួចរាល់នៅអំឡុង២០២៧ខាងមុខ។ក្រសួងសាធារណការ​និងដឹកជញ្ជូន បានអំពាវនាវដល់អ្នកប្រើប្រាស់កំណាត់ផ្លូវជាតិលេខ៥(សិរីសោភ័ណ-ប៉ោយប៉ែត)មេត្តាប្រុងប្រយ័ត្នខ្ពស់ ដោយបើកបរក្នុងល្បឿនមួយអាចគ្រប់គ្រងបាន ដើម្បីធានាសុវត្ថិភាពខ្លួនឯង និងអ្នកដទៃ ជាពិសេសកាត់បន្ថយការហុយដីលើបងប្អូនប្រជាពលរដ្ឋនៅតាមដងផ្លូវ និងសូមថ្លែងអំណរគុណដល់ប្រជាពលរដ្ឋរស់នៅតាមសងខាងផ្លូវ និងប្រជាពលរដ្ឋធ្វើដំណើរ ដែលមានការយោគយល់ អធ្យាស្រ័យខ្ពស់ ក្នុងពេលដំណើរការដ្ឋានពង្រីក និងលើកកម្រិតគុណភាពកំណាត់ផ្លូវជាតិលេខ៥ កំពុងដំណើរការដ៏មមាញឹកនេះ៕