ផ្លូវមួយខ្សែដែលមានប្រវែងជិត ៣.០០០ ម៉ែត្រ ដែលស្ថិតក្នុងឃុំចំនួនពីរ គឺឃុំមោង និងឃុំរបស់មង្គល កំពុងរងការខូចខាតបង្កការលំបាកក្នុងការធ្វើដំណើរ អស់រយៈពេលប្រមាណជាង ៣ ឆ្នាំមកហើយ។បើតាមការលើកឡើងពីប្រជាពលរដ្ឋ និងអាជ្ញាធរមូលដ្ឋានស្រុកមោងឫស្សី ក្នុងខេត្តបាត់ដំបងបានឲ្យដឹងថា ផ្លូវមួយខ្សែដែលបែកចេញពីផ្លូវជាលេខ ៥ ក្បែរមូលដ្ឋានកងរាជអាវុធហត្ថស្រុក ឆ្លងកាត់ភូមិជាច្រើនក្នុងនោះមានភូមិព្រែកអាំ ភូមិឫស្សី១ ភូមិឬស្សី២ ភូមិកន្សៃបន្ទាយ ភូមិរ៉ា ភូមិកូនក្អែក ភូមិព្រៃព្រុំ និងភូមិអន្លង់កូប ស្ថិតក្នុងឃុំចំនួន ២ គឺឃុំមោង និងឃុំរបស់មង្គល ឆ្ពោះទៅកាន់ទំនប់ដូនទ្រី បានបង្កការលំបាកក្នុងការធ្វើដំណើរពិសេសគឺនៅរដូវធ្លាក់ភ្លៀង កុំថាឡើយតែរថយន្តសូម្បីតែការធ្វើដំណើរតាមកង់និងម៉ូតូក៏មានលំបាកខ្លាំងណាស់ដែរ។ បញ្ហានេះប្រជាពលរដ្ឋតែងតែលើកឡើង និងសំណូមពរឲ្យអាជ្ញាធរឬមន្ទីរពាក់ព័ន្ធជួយធ្វើយ៉ាងណាសម្រួលឲ្យងាយស្រួលក្នុងការធ្វើដំណើរផង ព្រោះផ្លូវនេះខូចជាង ៣ ឆ្នាំមកហើយ។តាមរយៈទូរសព្ទនៅព្រឹកថ្ងៃទី ៩ ខែកក្កដា ឆ្នាំ២០២៦ នេះ លោក វ៉ាន់ ថុល ប្រធានមន្ទីរអភិវឌ្ឍន៍ជនបទខេត្តបាត់ដំបងបានមានប្រសាសន៍បញ្ជាក់ប្រាប់ “កម្ពុជាថ្មី” ថា ផ្លូវដែលខូចខាតនេះមានប្រវែង ២.៨០០ ម៉ែត្រ ស្ថិតនៅក្នុងគម្រោងរបស់ក្រសួងអភិវឌ្ឍន៍ជនបទគ្រោងនឹងចាក់ក្រាលបេតុងអាមេ។ លោកថា ការដើមឡើយផ្លូវនេះជាគម្រោងរបស់ធនាគារអភិវឌ្ឍន៍អាស៊ី ADB ប៉ុន្តែក្រោយមកក្រោមគម្រោងរបស់អាល្លឺម៉ង់។ ដោយសារការស្ថាបនាចាប់ពីបឹង៣ ឆ្ពោះទៅកាន់ស្រុករុក្ខគិរីបានបញ្ចប់ ទើបរាជរដ្ឋាភិបាលបានស្នើសុំឲ្យអាល្លឺម៉ង់ជួយទទួលគម្រោងមួយនេះបន្ថែមទៀត ប៉ុន្តែការស្នើសុំបរាជ័យដោយសារគម្រោងរបស់អាល្លឺម៉ង់អស់ថវិកា។ ដោយសាររាជរដ្ឋាភិបាលបង្វែរគម្រោងទៅក្រោមក្រសួងអភិវឌ្ឍន៍ជនបទទទួលកិច្ចការបន្ត ផ្លូវនេះនឹងគ្រោងបើកការដ្ឋានស្ថាបនាជាផ្លូវក្រាលបេតុងមានប្រវែងសរុប ២.៨០០ ម៉ែត្រ៕