ក្រុមការងារបច្ចេកទេសចម្រុះតំណាងឱ្យស្ថាប័នរាជរដ្ឋាភិបាល និងដៃគូអភិវឌ្ឍន៍អន្តរជាតិ បានចុះពិនិត្យ និងវាយតម្លៃទីតាំងជាក់ស្តែងចំនួន ៤កន្លែង ដើម្បីធ្វើការប្រៀបធៀប និងជ្រើសរើសទីតាំងដែលសមស្របបំផុត សម្រាប់ការចាប់ផ្តើមគម្រោងសាងសង់ស្ពានកោះខ្សាច់ទន្លា ស្ថិតក្នុងខេត្តកណ្តាល។ សកម្មភាពចុះពិនិត្យទីតាំងផ្ទាល់នេះ បានប្រព្រឹត្តទៅកាលពីថ្ងៃអង្គារ ទី៣០ ខែមិថុនា ឆ្នាំ២០២៦ ដោយមានការចូលរួមពី៖ ១. ក្រុមការងារបច្ចេកទេសអង្គភាពគ្រប់គ្រងគម្រោងស្ពានកោះខ្សាច់ទន្លា នៃក្រសួងសាធារណការ និងដឹកជញ្ជូន (MPWT PMU-KTB) ២. ក្រុមការងារទីប្រឹក្សាបច្ចេកទេសគម្រោងស្ពានកោះខ្សាច់ទន្លា (ក្រុមហ៊ុន Chodai Co., Ltd និងក្រុមហ៊ុន ES International Consultants Co., Ltd) ៣. ក្រុមការងារទីប្រឹក្សាផ្នែកផលប៉ះពាល់បរិស្ថាន និងសង្គម (ESIA) ៤. ក្រុមការងារនៃនាយកដ្ឋានទូទៅនៃការតាំងទីលំនៅឡើងវិញ (GDR) ៥. ក្រុមការងារ និងក្រុមការងារទីប្រឹក្សា NTU នៃធនាគារវិនិយោគអឺរ៉ុប (EIB) និង ៦. អាជ្ញាធរមូលដ្ឋាន ដឹកនាំដោយលោកមេឃុំកោះខ្សាច់ទន្លា។ នៅក្នុងបេសកកម្មនេះ ក្រុមការងារបច្ចេកទេសបានប្រើប្រាស់ដ្រូន (Drone) ដើម្បីហោះហើរផ្តិតយករូបភាពពីលើអាកាសនៅទីតាំងជាក់ស្តែងទាំង ៤កន្លែង។ ទន្ទឹមនឹងនេះ ក្រុមការងារក៏បានធ្វើការពិនិត្យយ៉ាងលម្អិតទៅលើស្ថានភាពដី និងស្ថានភាពច្រាំងទន្លេជាក់ស្តែង ក៏ដូចជាវាយតម្លៃលើផលប៉ះពាល់នានាដែលអាចកើតមានឡើងចំពោះបរិស្ថាន និងសង្គមនៅក្នុងទីតាំងនីមួយៗផងដែរ។ក្រៅពីការពិនិត្យផ្នែកបច្ចេកទេស និងភូមិសាស្ត្រ ក្រុមការងារចម្រុះក៏បានចុះជួបប្រាស្រ័យទាក់ទង និងសាកសួរព័ត៌មានបឋមពីប្រជាពលរដ្ឋមូលដ្ឋាន អំពីស្ថានភាពរស់នៅ ក៏ដូចជាការប្រកបរបរទទួលទានប្រចាំថ្ងៃរបស់ពួកគាត់ដែលកំពុងរស់នៅលើកោះខ្សាច់ទន្លា ដើម្បីធានាថាគម្រោងអភិវឌ្ឍន៍ហេដ្ឋារចនាសម្ព័ន្ធដ៏មានសារៈសំខាន់មួយនេះ នឹងផ្តល់ផលប្រយោជន៍អតិបរមា និងកាត់បន្ថយផលប៉ះពាល់ឱ្យនៅកម្រិតទាបបំផុត។ គួរបញ្ជាក់ថា គម្រោងសាងសង់ស្ពានកោះខ្សាច់ទន្លានេះ គឺជាគម្រោងយុទ្ធសាស្ត្រមួយដែលនឹងជួយសម្រួលដល់ការធ្វើដំណើរ ការដឹកជញ្ជូនទំនិញ និងលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងតំបន់នោះឱ្យកាន់តែប្រសើរឡើង តាមរយៈការតភ្ជាប់កោះខ្សាច់ទន្លាទៅកាន់តំបន់ជុំវិញ៕