សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកថ្ងៃអង្គារ៍នេះ បានរំលឹកដល់ក្រុមហ៊ុនដឹកជញ្ជូនទាំងអស់កុំឱ្យដឹកលើសទម្ងន់កំណត់ដែលជាកត្តាធ្វើឱ្យខូចផ្លូវ ខណៈក្រសួងសាធារណការ និងដឹកជញ្ជូន បានបំពាក់ជញ្ជីងវៃឆ្លាត ដើម្បីពិនិត្យរថយន្តដឹកលើសកម្រិតកំណត់ដោយស្វ័យប្រវត្តិ។ក្នុងការងារនេះ សម្ដេចធិបតីក៏បានណែនាំឱ្យក្រសួងសាធារណការ និងដឹកជញ្ជូន ត្រូវពង្រឹងបន្ថែមលើបច្ចេកទេសសាងសង់ផ្លូវ និងត្រួតពិនិត្យលើរថយន្ដដែលដឹកលើសទម្ងន់កំណត់ ដើម្បីរួមគ្នាថែរក្សាផ្លូវ។ សម្ដេចបានចង្អុលបង្ហាញដល់ក្រសួងសាធារណការ ថា ត្រូវបន្តពង្រឹងប្រសិទ្ធភាព តម្លាភាព គណនេយ្យភាពរបស់ស្ថានីយ៍ជញ្ជីង ដើម្បីជំរុញការអនុវត្តច្បាប់ឱ្យបានតឹងរឹងចំពោះយានយន្តដឹកជញ្ជូនលើសទម្ងន់កម្រិតកំណត់។ការលើកឡើងរបស់សម្ដេចធិបតីបែបនេះ បានធ្វើឡើងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ នៅឯខេត្តកំពង់ចាម។ ពីវេទិកានេះ សម្ដេចនាយករដ្ឋមន្ត្រី ក៏សង្កត់ធ្ងន់ដល់ក្រសួងសាធារណការ ត្រូវបន្តយកចិត្តទុកដាក់ខ្ពស់ក្នុងការសាងសង់ និងត្រួតពិនិត្យបច្ចេកទេសគម្រោងសាងសង់ហេដ្ឋារចនាសម្ព័ន្ធរូបវន្តឱ្យបានត្រឹមត្រូវតាមស្ដង់ដារបច្ចេកទេសប្រកបដោយគុណភាពខ្ពស់ ហើយបញ្ឈប់ឱ្យបាននូវពាក្យថា«ចាក់ក្រាសស៊ីស្ដើង ចាក់ស្ដើងស៊ីក្រាស»។តាមការគូសបញ្ជាក់របស់សម្ដេចធិបតី រាជរដ្ឋាភិបាលតែងតែចាត់ទុកផ្លូវគឺជាសរសៃឈាមនៃសេដ្ឋកិច្ចជាតិ ដោយបន្តផ្តល់អាទិភាពខ្ពស់ចំពោះការអភិវឌ្ឍប្រព័ន្ធផ្លូវថ្នល់ ផ្លូវដែក ផ្លូវទឹក និងផ្លូវអាកាស ស្របតាមទិសស្លោក «មានផ្លូវ មានសង្ឃឹម»។ គួរកត់សម្គាល់ថា ថ្មីៗនេះ ច្បាប់ស្តីពីផ្លូវថ្នល់ ត្រូវបានធ្វើវិសោធនកម្ម ដែលការវិសោធនកម្មច្បាប់ស្តីពីផ្លូវថ្នល់នេះ ត្រូវការរាជរដ្ឋាភិបាល បញ្ជាក់ថា គឺដើម្បីជំរុញការលើកកម្ពស់លើវិស័យដឹកជញ្ជូន និងឡូជីស្ទិកជាតិ តាមរយៈការគ្រប់គ្រង អភិវឌ្ឍ និងអភិរក្សហេដ្ឋារចនាសម្ព័ន្ធផ្លូវថ្នល់ សំដៅធានាចីរភាព និងគុណភាពផ្លូវថ្នល់ ជាពិសេសតាមរយៈការបង្កើនប្រសិទ្ធភាពនៃការទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ និងការកែសម្រួលការពិន័យអន្តរការណ៍ឱ្យបានច្បាស់លាស់៕