គម្រោងលើកកម្រិតកំណាត់ផ្លូវជាតិលេខ ៧ តម្លៃ ១១៧ លានដុល្លារ ដែលមានប្រវែងប្រមាណជាង ៤៥គីឡូម៉ែត្រ ចាប់ពីរង្វង់មូលស្គន់ រហូតដល់រង្វង់មូលគល់ស្ពានគីហ្សូណាក្រុងកំពង់ចាម ខេត្តកំពង់ចាម ត្រូវបានដាក់ឱ្យប្រើប្រាស់ជាផ្លូវការនៅព្រឹកថ្ងៃទី ៧ កក្កដា ២០២៦ ក្រោមអធិបតីភាពសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។គម្រោងលើកកម្រិតកំណាត់ផ្លូវជាតិលេខ ៧ ត្រូវបានបើកការដ្ឋានសាងសង់កាលពីថ្ងៃទី ០៩ មករា ២០២៣ ត្រូវបានស្ថាបនាជាប្រភេទផ្លូវបេតុងកៅស៊ូ មាន ៤ គន្លង (២ទៅ ២មក)។ គម្រោងនេះ ត្រូវបានសាងសង់ដោយក្រុមហ៊ុនសាជីវកម្មថ្នល់ និងស្ពានចិន(CRBC) ដោយបានចំណាយថវិការប្រមាណ ១១៧ លានដុល្លារ ដែលជាឥណទានសម្បទានពីរដ្ឋាភិបាលសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា។លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា កំណាត់ផ្លូវជាតិលេខ ៧ នេះ គឺជាខ្សែផ្លូវសំខាន់ និងជាសរសៃឈាមសេដ្ឋកិច្ចដ៏មានសក្ដានុពល ដែលបានតភ្ជាប់ជាមួយបណ្ដាញផ្លូវនានាឆ្ពោះទៅកាន់រាជធានី ខេត្ត។ ការសាងសង់កំណាត់ខ្សែផ្លូវនេះ បានប្រែក្លាយជាខ្សែផ្លូវដ៏រឹងមាំធំទូលា និងដើរតួនាទីសំខាន់ ក្នុងការជួយសម្រួលការធ្វើដំណើរ និងដឹកជញ្ជូនកសិផល។សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា ការពង្រីកកម្រិតផ្លូវនេះ ក៏ទាក់ទាញការវិនិយោគលើការបង្កើតរោងចក្រ និងអាជីវកម្មផ្សេងៗ។ សម្ដេចធិបតី ហ៊ុន ម៉ាណែត បន្ថែមថា គម្រោងនេះ នឹងផ្ដល់ផលចំណេញខ្ពស់ប្រមាណ ១៥,២៧% ដែលជាអត្រាចំណេញខ្ពស់ពីការវិនិយោគកសាងផ្លូវជាតិ។ សម្ដេចធិបតី បញ្ជាក់ថា៖ «ផល ១៥% គឺជាផលចំណេញពីការដឹកជញ្ជូន បានន័យថា បង្រួមដី កាលមុនជិះមួយម៉ោង ឥឡូវនេះជិះកន្លះម៉ោង ចំណាយដឹកកសិផលក៏តិចជាងមុន ប៉ុន្តែក៏អាចទាក់ទាញបន្ថែមនូវវិស័យឧស្សាហកម្ម រោងចក្រ កន្លែងផលិត និងអាជីវកម្មផ្សេងៗ»៕