កិច្ចប្រជុំជំនាញបច្ចេកទេសតាមយន្តការទីស្ដីការគណៈរដ្ឋមន្ត្រី ដើម្បីពិនិត្យ និងពិភាក្សាលើសេចក្ដីព្រាងអនុក្រឹត្យស្ដីពី ការបង្កើតគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ព្រំដែន ទីស្ដីការគណៈរដ្ឋមន្រ្តី៖ នាថ្ងៃអង្គារ ទី៧ ខែកក្កដា ឆ្នាំ២០២៦ ឯកឧត្តម ប៉ាល់ ចន្ទតារា រដ្ឋលេខាធិការ និងជាប្រធានក្រុមការងារកែទម្រង់ច្បាប់របស់ក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួងជាថ្នាក់ដឹកនាំ និងមន្ត្រីជំនាញ ចូលរួមកិច្ចប្រជុំជំនាញបច្ចេកទេសតាមយន្តការទីស្ដីការគណៈរដ្ឋមន្ត្រី ដើម្បីពិនិត្យនិងពិភាក្សាលើសេចក្ដីព្រាងអនុក្រឹត្យស្ដីពី ការង្កើតគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ព្រំដែន ក្រោមអធិបតីភាពសហប្រធាន ឯកឧត្តម លីវ សុវណ្ណា អនុប្រធាន និងជាប្រធានក្រុមការងារទី៤ នៃក្រុមប្រឹក្សាអ្នកច្បាប់ និងឯកឧត្តម នៅ បោនន័រ អនុប្រធាន និងជាប្រធានក្រុមការងារទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ តំណាងក្រសួង ស្ថាប័នពាក់ព័ន្ធ សមាជិកក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ គណៈកម្មការភាសាវិទ្យាខ្មែរ និងឯកឧត្តម លោកជំទាវ លោក លោកស្រីជាថ្នាក់ដឹកនាំនិងមន្ត្រីជំនាញនៃទីស្តីការគណៈរដ្ឋមន្ត្រី។ កិច្ចប្រជុំរៀបចំឡើងក្នុងគោលបំណងពិនិត្យនិងពិភាក្សាលើសេចក្ដីព្រាងអនុក្រឹត្យស្ដីពីការបង្កើតគណៈកម្មាធិការជាតិសម្របសម្រួលការដឹកជញ្ជូនឆ្លងកាត់ព្រំដែន ឱ្យកាន់តែមានខ្លឹមសារគ្រប់ជ្រុងជ្រោយ សំដៅ ពង្រឹងយន្តការសម្របសម្រួល និងតាមដានត្រួតពិនិត្យការអនុវត្តកិច្ចព្រមព្រៀងនានា ពាក់ព័ន្ធការដឹកជញ្ជូនឆ្លងកាត់ព្រំដែន ទាំងក្នុងក្របខ័ណ្ឌ អាស៊ាន (AFAFGIT) និងមហាអនុតំបន់មេគង្គ (GMS-CBTA) ឱ្យមានប្រសិទ្ធភាពខ្ពស់ ឆ្លើយតបទៅនឹងតម្រូវការបច្ចេកទេស និងកាតព្វកិច្ចរបស់កម្ពុជា ក្នុងនាមជាសមាជិកអាស៊ាននិងសមាជិកនៃកិច្ចព្រមព្រៀងពហុភាគីផ្សេងៗទៀត ស្តីពីការសម្រួលការដឹកជញ្ជូនឆ្លងកាត់ ព្រមទាំងជំរុញការសម្រួលលំហូរទំនិញ និងអ្នកដំណើរឆ្លងកាត់ព្រំដែនឱ្យមានភាពសាមញ្ញ ឆាប់រហ័ស និងកាត់បន្ថយចំណាយ សំដៅលើកកម្ពស់វិស័យដឹកជញ្ជូន និងពាណិជ្ជកម្មរបស់កម្ពុជា៕