គណៈប្រតិភូក្រសួងសាធារណការ និងដឹកជញ្ជូន ចូលរួមកិច្ចប្រជុំលើកទី១៩៩ នៃវេទិកាពិភពលោកសម្រាប់ការធ្វើសុខដុមនីយកម្មបទប្បញ្ញត្តិយានយន្ត (WP.29) នៅទីក្រុងហ្សឺណែវ ប្រទេសស្វីស ប្រទេសស្វីស៖ ចាប់ពីថ្ងៃទី២៣ ដល់ថ្ងៃទី២៦ ខែមិថុនា ឆ្នាំ២០២៦ លោក ជា មុនីកូរ៉ាន អគ្គនាយករង និងមន្ត្រីជំនាញនៃអគ្គនាយកដ្ឋានដឹកជញ្ជូនផ្លូវគោក បានចូលរួមជាលើកដំបូងក្នុងកិច្ចប្រជុំលើកទី១៩៩ នៃវេទិកាពិភពលោកសម្រាប់ការធ្វើសុខដុមនីយកម្មបទប្បញ្ញត្តិយានយន្ត (WP.29) នៅទីស្នាក់ការអង្គការសហប្រជាជាតិ ទីក្រុងហ្សឺណែវ ប្រទេសស្វីស។ ការចូលរួមនៅពេលនេះធ្វើឡើង តបតាមការអញ្ជើញរបស់លេខាធិការដ្ឋាននៃគណៈកម្មការសេដ្ឋកិច្ចសម្រាប់អឺរ៉ុបរបស់អង្គការសហប្រជាជាតិ (UNECE)។ កិច្ចប្រជុំនេះ មានការចូលរួមពីតំណាងប្រទេសជារដ្ឋភាគី អង្គការអន្តរជាតិ និងសមាគមឧស្សាហកម្មយានយន្តជាច្រើន ដើម្បីពិនិត្យ និងអនុម័តលើវិសោធនកម្មបទប្បញ្ញត្តិបច្ចេកទេសយានយន្ត (UN Regulations) សំខាន់ៗ និងចាំបាច់ របស់អង្គការសហប្រជាជាតិ។ ការចូលរួមជាលើកដំបូងរបស់គណៈប្រតិភូកម្ពុជានាពេលនេះ គឺជាការបោះជំហានយ៉ាងសំខាន់មួយក្នុងនាមជាប្រទេសភាគីកិច្ចព្រមព្រៀងអង្គការសហប្រជាជាតិឆ្នាំ១៩៥៨ (1958 Agreement) ដើម្បីតាមដានយ៉ាងយកចិត្តទុកដាក់លើការវិវឌ្ឍថ្មីៗនៃបទប្បញ្ញត្តិបច្ចេកទេសយានយន្តសកល។ ការចាប់យកចំណេះដឹង និងបទពិសោធន៍ពីវេទិកានេះ នឹងចូលរួមចំណែកយ៉ាងសំខាន់ក្នុងការរៀបចំបទដ្ឋានគតិយុត្ត និងបទប្បញ្ញត្តិបច្ចេកទេសយានយន្តនៅកម្ពុជា ឱ្យស្របតាមស្តង់ដារអង្គការសហប្រជាជាតិ (UN Regulations) ដើម្បីធានានូវសុវត្ថិភាពចរាចរណ៍ ការពារបរិស្ថាន និងជំរុញការវិនិយោគលើវិស័យយានយន្តក្នុងព្រះរាជាណាចក្រកម្ពុជា៕