ឯកឧត្តម ឈួន វិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី អញ្ជើញជាអធិបតីកិច្ចប្រជុំបូកសរុបលទ្ធផលការងារឆមាសទី១ និងទិសដៅបន្តឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី មណ្ឌលគិរី៖ នារសៀលថ្ងៃសុក្រ ទី២៦ ខែមិថុនា ឆ្នាំ២០២៦ ឯកឧត្តម ឈួន វិន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញជាអធិបតី ដឹកនាំកិច្ចប្រជុំបូកសរុបលទ្ធផលការងារឆមាសទី១ និងទិសដៅបន្តឆ្នាំ២០២៦ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដែលបានប្រព្រឹត្តទៅនៅសាលាខេត្តមណ្ឌលគិរី ដោយមានវត្តមានចូលរួមពី ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី ឯកឧត្តម គង់ គឹមនី អភិបាលនៃគណៈអភិបាលខេត្ត និងជាអនុប្រធានអចិន្ត្រៃយ៍ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ឯកឧត្តមអនុប្រធានក្រុមការងារ និងឯកឧត្តម លោកជំទាវ លោក លោកស្រី ដែលជាសមាជិក សមាជិកា នៃក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងមន្ត្រីពាក់ព័ន្ធពីគ្រប់អង្គភាពជុំវិញខេត្ត ជាច្រើនរូបផងដែរ។ លទ្ធផលការងារឆមាសទី១ ឆ្នាំ២០២៦ ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានចូលរួមគាំទ្រ និងចូលរួមអនុវត្តកម្មវិធីគោលនយោបាយអាទិភាពទាំង៦ និងវិធានការគន្លឹះទាំង៥ របស់រាជរដ្ឋាភិបាល នីតិកាលទី៧ នៃរដ្ឋសភា រួមទាំងការគាំទ្រ និងជំរុញការអនុវត្តគោលនយោបាយភូមិ ឃុំ សង្កាត់មានសុវត្ថិភាព កំណែទម្រង់វិមជ្ឈការ និងវិសហមជ្ឈការ ការផ្តល់សេវាជូនប្រជាពលរដ្ឋតាមយន្តការច្រកចេញចូលតែមួយ។ ក្នុងរយៈពេលឆមាសទី១ កន្លងមកនេះ ក្រុមការងារសម្រេចបានសមិទ្ធផលសំខាន់ៗ ដូចជា ការចុះធ្វើវេទិកាសាធារណៈ វិស័យបានលើកឡើងច្រើនជាងគេក្នុងវេទិកាសាធារណៈ កិច្ចសហការរួមគ្នាចុះពិនិត្យព្យាបាលជំងឺ២លើកជូនប្រជាពលរដ្ឋដោយឥតគិតថ្លៃ បានបញ្ចប់ឯកសារជំនួយស្មារតីក្រុមការងារ បានបោះពុម្ព និងចែកខិតបណ្ណវិស័យអាទិភាពទាំង៥ និងបញ្ចប់ការងារសហការចុះចែកចង្រ្កានក្រុងស្រុកទាំង៥។ ទន្ទឹមនឹងនេះ ឯកឧត្តមប្រធានបានស្នើក្រុមការងាររាជរដ្ឋាភិបាលចុះមូលដ្ឋាន បន្តយកចិត្តទុកដាក់អនុវត្តតួនាទី និងភារកិច្ច សេចក្តីណែនាំរបស់រាជរដ្ឋាភិបាល ដែលបានដាក់ចេញកន្លងមក ឱ្យទទួលបានប្រសិទ្ធភាព និងបានដាក់ចេញទិសដៅបន្តរួមមានៈ ការងារបន្តចុះធ្វើវេទិកាសាធារណៈ ការងារបន្តជំរុញផ្សព្វផ្សាយ យន្តការពង្រឹងក្រុមការងាររាជរដ្ឋាភិបាលចុះមូលដ្ឋាន ការងារអាទិភាពក្នុងវិស័យមួយចំនួន ព្រមទាំងការងារផ្សេងៗមួយចំនួនទៀតផងដែរ។ ឯកឧត្តមប្រធាន បានអបអរសាទរ និងសម្តែងនូវការកោតសរសើរ វាយតម្លៃខ្ពស់លើសមិទ្ធផលទាំងអស់ និងថ្លែងអំណរគុណចំពោះក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ និងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ នៅខេត្តមណ្ឌលគិរី បានខិតខំប្រឹងប្រែងរួមគ្នាក្នុងការបំពេញភារកិច្ចទៅតាមតួនាទីរៀងៗខ្លួន ប្រកបដោយប្រសិទ្ធភាព និងការទទួលខុសត្រូវខ្ពស់ ដែលនាំឱ្យក្រុមការងាររាជរដ្ឋាភិបាលចុះមូលដ្ឋានរបស់ខេត្ត ទទួលបានលទ្ធផលជាច្រើនគួរឱ្យកត់សម្គាល់៕