កិច្ចប្រជុំពិភាក្សាស្ដីពីការរៀបចំបញ្ជីប៉ាន់តម្លៃស្ដង់ដា (BOQ Cost Standard) តាមមូលដ្ឋានតម្លៃឯកតា (Unit Rate Base) ទីស្តីការក្រសួង៖ នាថ្ងៃព្រហស្បតិ៍ ទី២៥ ខែមិថុនា ឆ្នាំ២០២៦ ឯកឧត្តម យិត បុណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំកិច្ចប្រជុំពិភាក្សាស្តីពីការរៀបចំបញ្ជីប៉ាន់តម្លៃស្ដង់ដា (BOQ Cost Standard) តាមមូលដ្ឋានតម្លៃឯកតា (Unit Rate Base) ជាមួយតំណាងក្រុមហ៊ុនទីប្រឹក្សាបច្ចេកទេស ក្វាងចូវវ៉ានអាន (Guangzhou Wanan Construction Supervision Co., Ltd.) ក្រុមហ៊ុនសាជីវកម្មស្ពាន និងថ្នល់ ចិន (China Road and Bridge Corporation) និងក្រុមហ៊ុនសំណង់សៀងហៃគ្រុប ខូអិលធីឌី (Shanghai Construction Group Co., Ltd.) ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមទីប្រឹក្សាក្រសួង ឯកឧត្តមអគ្គនាយកបច្ចេកទេស លោកអគ្គនាយករងបច្ចេកទេស ព្រមទាំងមន្ត្រីជំនាញពាក់ព័ន្ធមកពីនាយកដ្ឋានក្រោមឱវាទអគ្គនាយកដ្ឋានជាច្រើនរូប។ កិច្ចប្រជុំនេះត្រូវបានរៀបចំឡើងក្នុងគោលបំណងពិភាក្សា និងកំណត់យន្តការរៀបចំប្រព័ន្ធស្តង់ដាតម្លៃឯកតា (Unit Rate Cost) សម្រាប់ប្រភេទការងារផ្សេងៗនៃគម្រោងហេដ្ឋារចនាសម្ព័ន្ធផ្លូវថ្នល់ ការផ្លាស់ប្តូរមតិយោបល់ និងបទពិសោធន៍បច្ចេកទេសពាក់ព័ន្ធនឹងការរៀបចំបញ្ជីប៉ាន់តម្លៃស្ដង់ដា ព្រមទាំងពិភាក្សាលើវិធីសាស្ត្រ និងគោលការណ៍សំខាន់ៗ ដើម្បីធានាឱ្យការរៀបចំស្តង់ដានេះមានលក្ខណៈសមស្រប តាមតម្រូវការជាក់ស្តែង និងអាចអនុវត្តបានប្រកបដោយប្រសិទ្ធភាព។ តាមរយៈកិច្ចប្រជុំនេះ ភាគីទាំងអស់បានឯកភាពគ្នាលើគោលការណ៍សំខាន់ៗមួយចំនួន និងបានប្តេជ្ញាចិត្តបន្តសហការគ្នាយ៉ាងជិតស្និទ្ធ ដើម្បីសម្រេចឱ្យបាននូវសៀវភៅណែនាំស្តង់ដាមួយ ដែលអាចយកទៅអនុវត្តប្រកបដោយប្រសិទ្ធភាពខ្ពស់ក្នុងពេលឆាប់ៗខាងមុខនេះ ក្នុងន័យរួមចំណែកដល់ការអភិវឌ្ឍវិស័យសាធារណការ និងដឹកជញ្ជូន ប្រកបដោយប្រសិទ្ធភាព និងចីរភាព៕