ក្រុមការងារបច្ចេកទេសក្រសួងសាធារណការ និងដឹកជញ្ជូន ចុះពិនិត្យវាយតម្លៃ ភាពត្រឹមត្រូវតាមស្ថានីយជញ្ជីង នៅថ្ងៃអង្គារ ទី២៣ ខែមិថុនា ឆ្នាំ២០២៦ ក្រុមការងារបច្ចេកទេសក្រសួងសាធារណការ និងដឹកជញ្ជូន និងមន្រ្តីជំនាញរបស់លេខាធិការដ្ឋាន នៃគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានចុះពិនិត្យ វាយតម្លៃ តាមស្ថានីយជញ្ជីងលើផ្លូវជាតិលេខ១ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៤១ និងផ្លូវជាតិលេខ៦ ដើម្បីអោយមានសង្គតិភាព ត្រឹមត្រូវ និងមានភាពប្រហាក់ប្រហែលគ្នាដែលអនុលោមតាមច្បាប់ជាធរមាន។ សូមបញ្ជាក់ផងដែរថា គ្រប់ជញ្ជីងអចល័តទាំងអស់របស់ក្រសួងសាធារណការ និងដឹកជញ្ជូន បានធ្វើការផ្ទៀងផ្ទាត់ និងព្យាសកម្មស្តង់ដាទម្ងន់ ជារៀងរាល់ឆ្នាំ ដោយមជ្ឈមណ្ឌលមាត្រាសាស្ត្រជាតិ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ជាលទ្ធផល ក្រោយពីត្រួតពិនិត្យ និងវាយតម្លៃតាមបណ្ដាស្ថានីយខាងលើ កម្រិតលំអៀងពីស្ថានីយនីមួយៗ គឺស្ថិតនៅក្នុងកម្រិត បូកឬដក ៥% ដូចមានចែងក្នុងច្បាប់ផ្លូវថ្នល់។ ទន្ទឹមនឹងនេះ ក្រសួងក៏សូមអំពាវនាវដល់អ្នកបើកបរយានយន្តដឹកជញ្ជូនធុនធ្ងន់ទាំងអស់ សូមចូលថ្លឹងតាមស្ថានីយឱ្យត្រឹមត្រូវតាមបច្ចេកទេស ទាំងល្បឿន ទាំងឥរិយាបថ ដើម្បីឱ្យការថ្លឹងនោះប្រកបដោយសុក្រិតភាព នឹងភាពត្រឹមត្រូវ៕