លោកស្រី កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន នៅថ្ងៃទី ២៤ មិថុនា ២០២៦ បានដឹកនាំកិច្ចប្រជុំលើកទី១ នៃក្រុមការងារអភិវឌ្ឍន៍ក្នុងតំបន់ (Regional Development Working Group) សម្រាប់គម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់ ដោយមានការចូលរួមពីសមាជិកអន្តរក្រសួង-ស្ថាប័ន នៃក្រុមការងារអភិវឌ្ឍន៍ក្នុងតំបន់ តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំកម្ពុជា និងមន្ត្រីពាក់ព័ន្ធជាច្រើនរូប។កិច្ចប្រជុំនេះរៀបចំឡើងក្នុងគោលបំណង ដើម្បីពិនិត្យពិភាក្សាលើលទ្ធផលសិក្សាបឋម ដោយផ្តោតលើការអភិវឌ្ឍក្នុងតំបន់ និងតំបន់សេដ្ឋកិច្ចពិសេស មជ្ឈមណ្ឌលឡូជីស្ទីកបណ្ដាញហេដ្ឋារចនាសម្ព័ន្ធដឹកជញ្ជូន និងខ្សែច្រវ៉ាក់ត្រជាក់ ការសម្របសម្រួលពាណិជ្ជកម្ម និងឌីជីថលូបនីយកម្ម និងគោលនយោបាយឧស្សាហកម្ម និងដើម្បីប្រមូលធាតុចូលបន្ថែមពីគ្រប់ភាគីពាក់ព័ន្ធក្នុងការជំរុញកិច្ចសហការឱ្យការសិក្សាផែនការមេប្រែក្លាយកំពង់ផែសមុទ្រទឹកជ្រៅតែមួយគត់របស់កម្ពុជា ឱ្យក្លាយជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់នេះ មានភាពច្បាស់លាស់ គ្រប់ជ្រុងជ្រោយ ត្រឹមត្រូវតាមលក្ខណៈបច្ចេកទេស និងសម្រេចបានតាមចក្ខុវិស័យកម្ពុជាឆ្នាំ២០៥០។លោកស្រី កុយ សុដានី បានស្នើឱ្យភាគីជប៉ុនបន្តកិច្ចសហការ ធ្វើយ៉ាងណាជំរុញឱ្យការសិក្សាផែនការលម្អិតចូលរួមចំណែកអភិវឌ្ឍសមត្ថភាពកំពង់ផែក្រុងព្រះសីហនុ និងលើកកម្ពស់ភាពប្រកួតប្រជែងរបស់កម្ពុជាក្នុងវិស័យដឹកជញ្ជូន និងឡូជីស្ទីក ឱ្យកាន់តែប្រសើរ និងមានភាពប្រទាក់ក្រឡា៕