ការចុះពិនិត្យវឌ្ឍនភាពការងារនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) ក្នុងក្រុងសៀមរាប និងពិភាក្សាពីចីរភាពនៃអង្គភាពគ្រប់គ្រងប្រព័ន្ធចម្រោះទឹកកខ្វក់ នៃមន្ទីរសាធារណការ និងដឹកជញ្ជូនខេត្តសៀមរាប សៀមរាប៖ នាថ្ងៃអង្គារ ទី២៣ ខែមិថុនា ឆ្នាំ២០២៦ ឯកឧត្តម ចៅ សុភៈភិបាល អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារអង្គភាពគ្រប់គ្រងគម្រោង (CMU-2) ចុះត្រួតពិនិត្យវឌ្ឍនភាពការងារនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) រួមគ្នាជាមួយក្រុមការងារបច្ចេកទេសធនាគារពិភពលោក (WB) ដឹកនាំដោយ លោក កូវ ភារម្យ ប្រធានក្រុមការងារទៅកាន់ទីតាំងអនុវត្តគម្រោងក្នុងក្រុងសៀមរាប ខេត្តសៀមរាប ក្នុងគោលបំណងចុះត្រួតពិនិត្យសកម្មភាពជាក់ស្តែង ជជែកពិភាក្សាវឌ្ឍនភាពការងារនៃកញ្ចប់កិច្ចសន្យានីមួយៗ ពិនិត្យលើបញ្ហាប្រឈមនៅសេសសល់ ដើម្បីសម្របសម្រល និងដោះស្រាយបានទាន់ពេលវេលា ព្រមទាំងជជែកពិភាក្សាពីចីរភាពនៃអង្គភាពគ្រប់គ្រងប្រព័ន្ធចម្រោះទឹកកខ្វក់ (Sustainable Operation) នៃមន្ទីរសាធារណការ និងដឹកជញ្ជូនខេត្តសៀមរាប ក្រោយគម្រោងត្រូវបានបិទបញ្ចប់ចុងឆ្នាំ២០២៦។ វឌ្ឍនភាពការងារនៃកញ្ចប់និមួយៗមានលទ្ធផលដូចខាងក្រោម៖ (១). កញ្ចប់ MPWT-CW-4 បានអនុវត្តសម្រេច ១០០%(២). កញ្ចប់ MPWT-CW-1A បានអនុវត្តសម្រេច ១០០% (៣). កញ្ចប់ MPWT-CW-3 មានវឌ្ឍនភាពសម្រេចបានប្រមាណ ១០០% (៤). កញ្ចប់ MPWT-CW-6A មានវឌ្ឍនភាពសម្រេចបានប្រមាណ ៩៣,៩៣% និង (៥). កញ្ចប់ MPWT-CW-9 មានវឌ្ឍនភាពសម្រេចបានប្រមាណ ៥០,៧១%។ សកម្មភាពចុះពិនិត្យវឌ្ឍនភាព និងកិច្ចប្រជុំមានការចូលរួមពីមន្ត្រី CMU-2 បុគ្គលិកធនាគារពិភពលោក (World Bank) មន្ត្រីអង្គភាពគ្រប់គ្រងប្រព័ន្ធចម្រោះទឹកកខ្វក់ខេត្តសៀមរាប ក្រុមការងារទីប្រឹក្សាគម្រោង Consultant CTI Engineering International Co., Ltd JV PPIC Co., Ltd ក្រុមការងារក្រុមហ៊ុនសាងសង់ China Railway No.2 Engineering Group Co., Ltd និងក្រុមហ៊ុនសាងសង់ Phkay Prek & Jace Korea-Joint Venture ព្រមទាំងមន្ត្រីជំនាញបច្ចេកទេសពាក់ព័ន្ធផងដែរ៕